सातारा : सातारा तालुक्याच्या परळी भागातील सांडवली वारसवाडी येथील जवान विजय रामचंद्र कोकरे (Jawan Vijay Kokare) हे जम्मू काश्मीर येथे कर्तव्य बजावताना हुतात्मा झाले. याबाबतची माहिती त्यांच्या नातेवाइकांना आर्मी सेंटरकडून मिळाली आहे.

सांडवली परिसरात त्यांच्या श्रद्धांजलीचे फलक लावण्यात आले आहेत. सैन्य दलात ते गेली चार वर्षे कार्यरत होते. जम्मू काश्मीरमध्ये कर्तव्य बजावताना ते हुतात्मा झाले. त्यांचे पार्थिव गावी कधी येणार आहे, याबाबत अधिकचा तपशील मिळू शकला नाही.

दरम्यान, परळी परिसर शोकसागरात बुडाला आहे. जवान विजय कोकरे यांचे शिक्षण मुंबईत झाले आहे. त्यांचे आई-वडीलही मुंबईतच राहतात. त्यांचे वडील मुंबईत खासगी वाहनचालक आहेत. जवान विजय कोकरे यांच्या मागे आई-वडील आणि बहीण असा परिवार आहे.