भुईंज (जि.सातारा) : पाचवड- मेढा रस्त्यावर अमृतवाडी गावानजीक स्थानिक गुन्हे अन्वेषण विभागाच्या पथकाने पाठलाग करून अवैध वाळू वाहतूक करणारा डंपर ताब्यात घेतला आहे. या प्रकरणी दोघांवर भुईंज पोलिस ठाण्यात गुन्हा दाखल करण्यात आला आहे.
 
डंपर मालक राहुल ऊर्फ गणेश विश्वनाथ इथापे (वय 31) व चालक तुषार सुरेश निकम (वय 24, दोघे रा. देगाव, ता. वाई) अशी त्यांची नावे आहेत. पोलिसांनी दिलेल्या माहितीनुसार, वाई तालुक्‍यातील कडेगाव, असले, देगाव, पाचवड, भुईंज, कळंभे व जावळी तालुक्‍यातील सर्जापूर येथील नदीपात्रातून बेकायदेशीर वाळू उपसा होत असल्याची माहिती एलसीबीच्या पथकाला मिळाली होती. त्या अनुषंगाने एलसीबीचे एक पथक काल पाचवड- मेढा रस्त्यावर पेट्रोलिंग करत होते. या वेळी अमृतवाडी (ता. वाई) हद्दीत तीन ब्रास वाळू भरलेला डंपर रस्त्याने जात असलेला त्यांना दिसला. पोलिसांनी डंपर थांबवून चौकशी केली. या वेळी त्यांच्याकडे कोणतीही परवानगी नसल्याचे समोर आले. त्यानंतर पोलिसांनी त्यांच्या ताब्यातील वाळूसह डंपर, दोन मोबाईल व रोख रक्कम असा 18 लाख 57 हजार 795 रुपयांचा मुद्देमाल जप्त केला, तसेच दोघांवर परवान्याशिवाय वाळू चोरून अवैध वाहतूक केल्याप्रकरणी गुन्हा दाखल करण्यात आला आहे.
 
स्थानिक गुन्हे अन्वेषण विभागाचे निरीक्षक सर्जेराव पाटील यांच्या मार्गदर्शनाखाली उपनिरीक्षक प्रसन्न जऱ्हाड, हवालदार तानाजी माने, विजय कांबळे, नितीन गोगावले, प्रवीण फडतरे, विशाल पवार हे या कारवाईत सहभागी होते.

मसूर : पोलिसांच्या छाप्यात वाळू माफियांकडून 40 लाख 51 हजारांचा मुद्देमाल जप्त