गोंदवले (जि. सातारा) : कोरोनाबाधित रुग्णसंख्या कमी होत असल्याने जनजीवन सुरळीत होण्याच्या मार्गावर असतानाच बाधितांमध्ये वाढ झाल्याने आज (बुधवार) पुन्हा गाेंदवले ‘लॉक’ करण्यात आले आहे. सकाळी एकाच भागात ११ रुग्ण आढळल्याने प्रशासनाने तातडीने नागरिकांची घरोघरी जाऊन आराेग्य तपासणीची मोहीम सुरू केली आहे आहे. (satara-marathi-news-gondawale-lockdown-continues-covid19-patients-increased)

गोंदवल्यात आत्तापर्यंत एकूण ४१२ कोरोनाबाधित रुग्ण सापडले, तर ११ रुग्ण दगावल्याची नोंद शासन दरबारी आहे. गेल्या दोन दिवसांपूर्वी गावात रुग्णसंख्या दहा होती. त्यात काल एकाची भर पडली असली तरी कोरोनाचा प्रभाव कमी होत असल्याची समाधानकारक बाब होती. जिल्ह्यातील रुग्णासंख्येत मोठी घट होत असल्याने जिल्हा प्रशासनाने निर्बंध शिथिल केल्याने सर्वसामान्यांना मोठा दिलासा मिळाला आहे. गोंदवल्यात मात्र अद्यापही निर्बंध शिथिल केले नव्हते. येत्या दोन ते तीन दिवसांत निर्बंध शिथिल होण्याची शक्यता असतानाच आज (बुधवारी) सकाळी पुन्हा येथील रुग्णसंख्या वाढली. एकाच वेळी तब्बल ११ रुग्णांची भर पडल्याने अजूनही कोरोनाचा धोका असल्याची बाब अधोरेखित झाली.

गावात अचानक रुग्णसंख्या वाढल्याने प्रशासनाने उपाययोजना वेगवान केल्या आहेत. अंगणवाडी सेविका व मदतनिसांच्या मदतीने आरोग्य विभागाने गावात तातडीने सर्वेक्षण सुरू केले आहे. संशयित रुग्णांची कोरोना तपासणी करण्यात येत आहे. त्यामुळे रुग्णसंख्येत वाढ होण्याची भीती व्यक्त होत आहे. परिणामी प्रांताधिकाऱी शैलेश सूर्यवंशी यांनी अत्यावश्यक सेवा वगळता गोंदवले लॉकच ठेवण्याचे आदेश दिले आहेत.

कोरोनाची तिसरी लाट?

विशेषतः आज आढळलेल्या बाधितांमध्ये लहान मुलांची संख्या लाक्षणिक आहे. त्यामुळे कोरोनाची तिसरी लाट सुरू झाली आहे का, अशी शंकाही उपस्थित होत आहे.