कोळकी (जि. सातारा) : फलटण तालुक्‍यासह जिल्ह्यामध्ये कोरोना रुग्णांची संख्या दिवसेंदिवस झपाट्याने वाढत असल्याच्या पार्श्वभूमीवर झिरपवाडी येथील फलटण ग्रामीण रुग्णालय सुरू करण्याची मागणी पुन्हा नागरिकांतून केली जाऊ लागली आहे. वापराविना अनेक वर्षे पडून असलेले हे ग्रामीण रुग्णालय सुरू करण्यासंबंधीचा निर्णय सहा महिन्यांपूर्वी रामराजे नाईक-निंबाळकर यांच्या उपस्थितीत विधानभवनात आरोग्य विभागामार्फत झालेल्या बैठकीत घेण्यात आला होता. त्याची अंमलबजावणी अद्याप न झाल्याने फलटण तालुक्‍यातील नागरिकांत प्रचंड नाराजी वाढली आहे. 

जुन्या, वापरात नसलेल्या या ग्रामीण रुग्णालयाच्या इमारतीत जनता, सार्वजनिक संस्था भागीदारी तत्त्वावर (पब्लिक प्रायव्हेट पार्टीसिपेशन) कोविड तसेच इतर संसर्गजन्य आजारासाठी रुग्णालय सुरू करण्याबाबतचा विधानभवनात विधान परिषदेचे सभापती रामराजे नाईक-निंबाळकर यांच्या अध्यक्षतेखाली सहा महिन्यांपूर्वी झालेल्या बैठकीमध्ये निर्णय घेण्यात आला होता. मात्र, अद्याप दुरुस्तीचे काम सुरू झालेले नाही. त्यावेळी बैठकीस आरोग्यमंत्री राजेश टोपे, आमदार दीपक चव्हाण, सार्वजनिक आरोग्य विभागाचे प्रधान सचिव, राष्ट्रीय आरोग्य अभियान आयुक्त एन. रामास्वामी, आरोग्यसेवा संचालनालय संचालिका डॉ. तायडे, फलटणचे प्रांताधिकारी डॉ. शिवाजीराव जगताप, सातारचे जिल्हा शल्यचिकित्सक उपस्थित होते. 

टोलचे भूत मानगुटीवरून उतरणार कधी?; उदयनराजेंसह महाविकास आघाडीतील नेत्यांची भूमिका ठरणार महत्त्वाची!

फलटण तालुक्‍यात सध्या रुग्णांची संख्या दिवसेंदिवस वाढत आहे. यापुढे तर भयानक स्थिती निर्माण होऊ शकते. फलटण येथील शेतीशाळा, जुने लेडिज होस्टेल, जुने मिनार हॉटेल, बाहुली शाळा ही ठिकाणे शासनाने त्यावेळी अधिग्रहित केली होती. परंतु, अखेर या ठिकाणी बेड अपुरे पडू लागल्याने फलटणमधीलच काही खासगी दवाखाने शासनाने ताब्यात घेतले होते. एक नामांकित हॉस्पिटल अधिग्रहित करण्यावरून वादही निर्माण झाला होता व ते हॉस्पिटल शासनाने सील केले होते. शासनाचे स्वतःचे झिरपवाडीतील ग्रामीण रुग्णालय केवळ वापराविना पडून असून शासन खासगी दवाखान्यांच्या मागे लागत असल्याने त्यावेळी तालुक्‍यातील नागरिकांनी आश्‍चर्य व्यक्त केले होते. फलटणच्या काही दवाखान्यांनी आपले काही बेड कोरोना रुग्णांसाठी दिले आहेत. मात्र, त्या दवाखान्यात येणाऱ्या इतर रुग्णांना कोरोना होण्याचा धोका मोठ्या प्रमाणात वाढलेला आहे. 

केंद्राला सहकारी साखर कारखानदारी मोडीत काढायची आहे का?; गृहराज्यमंत्र्यांचा मोदी सरकारला सवाल

महाराष्ट्र शासनाने फलटण तालुक्‍यातील जनतेच्या आरोग्याबरोबर चालवलेला खेळ त्वरित थांबवून झिरपवाडी ग्रामीण रुग्णालय लवकर सुरू करावे, अन्यथा जनआंदोलन उभे करावे लागेल.'' 

-दशरथ फुले, सामाजिक कार्यकर्ते, फलटण 

पाच राज्यात निवडणुका सुरू आहेत, म्हणून वित्त मंत्रालयाने निर्णय बदला का?; काॅंग्रेसच्या बड्या नेत्याची अर्थमंत्र्यांवर टीका

संपादन : बाळकृष्ण मधाळे