कऱ्हाड (जि. सातारा) : पालिकेच्या अधिकारी, कर्मचाऱ्यांसह नगरसेवकांना कोरोनाची चाचणी सक्तीची आहे. ती तपासणी करणार नाही, त्यांना पालिकेत प्रवेश दिला जाणार नाही, असे आदेश पालिकेचे मुख्याधिकारी रमाकांत डाके यांनी आज दिले. उद्या (मंगळवारी) पालिकेतील अधिकारी व नगरसेवकांसह नागरिकांना कोरोना चाचणी करून घेण्यासाठी दोन ठिकाणी स्वॅब टेस्टची, तर चार ठिकाणी लसीकरणाची सुविधाही पालिकेने केली आहे. 

शहरातील 45 वर्षांवरील सगळ्यांचेच लसीकरण होणार आहे. त्यासाठी त्वरित शहरात कालपासून तीन लसीकरण केंद्रे उभारली होती. त्यात आणखी एक केंद्र वाढवले आहे. स्वॅब टेस्टसाठी दोन ठिकाणी सोय केली आहे, अशी माहिती मुख्याधिकारी डाके यांनी दिली. शहरात 76 ऍक्‍टिव्ह कोरोनाबाधित रुग्ण आहेत. कोरोनावर नियंत्रण यावे, यासाठी मोठ्या प्रमाणात लसीकरणासह कोरोनाची तपासणी मोहीम पालिकेने हाती घेतली आहे. त्यासाठी शहरातील 45 वर्षांवरील सर्वांचे लसीकरण केले जाणार आहे. ते पूर्ण करण्यासाठी शहरात चार ठिकाणी लसीकरण केंद्रे सुरू केली आहेत. पालिकेच्या इमारतीसह नागरी आरोग्य केंद्राशिवाय त्रिशंकू भाग, कार्वे नाका, बैलबाजार रोड भाग, कोल्हापूर नाका, भेदा चौक परिसरात लसीकरण केंद्रे होणार आहेत. 

साताऱ्यात कोरोनाचा विस्फोट! जिल्हाधिकाऱ्यांनी काढला कडक निर्बंधाचा आदेश; जाणून घ्या काय सुरु, काय बंद..

शहरात कोरोनाचा वाढता प्रभाव रोखण्यासाठी पालिका व नागरी आरोग्य केंद्र प्रयत्नशील आहेत. त्याचाच भाग म्हणून पालिका अधिकारी, नगरसेवक व कर्मचाऱ्यांना कोरोना चाचणी सक्तीची केली आहे. ती न करणारास पालिकेत प्रवेश दिला जाणार नाही. 

-रमाकांत डाके, मुख्याधिकारी 

Covid Vaccine : कोरोनावर मात करण्यासाठी माजी मुख्यमंत्र्यांनी घेतली कऱ्हाडात लस

संपादन : बाळकृष्ण मधाळे