मायणी (जि. सातारा) : येथील मल्हारपेठ रोडवरील शिक्षण संकुलाच्या प्रवेशद्वारालगत रोज दहा ते 15 अपघात होत आहेत. कॉंक्रिटचा रस्ता आणि डांबरी रस्त्यातील सांधा न जुळल्याने अपघात होत असून अनेक जण गंभीर जखमी झाले आहेत. या रस्त्याची तातडीने दुरुस्ती करण्याची मागणी नागरिक करीत आहेत. 

पंढरपूर- मल्हारपेठ राज्यमार्गाचे काम सुरू आहे. चांदणी चौकातून मल्हारपेठकडे जाणाऱ्या रस्त्याचे मायणी भाग शिक्षण प्रसारक मंडळ शिक्षण संकुलाच्या प्रवेशद्वारापर्यंत सिमेंट कॉंक्रिटीकरण केले आहे. त्यापुढे डांबरीकरण करण्यात आले आहे. कॉंक्रिट व डांबरी रस्त्याच्या दरम्यानचा सांधा व्यवस्थित व समान पातळीत जुळलेला नाही. दोन्ही बाजूकडे चांगला रस्ता असल्याने वाहने भरधाव वेगाने येतात. अनेक चालकांना रस्त्याच्या सांध्याची कल्पना नसल्याने वाहने वेगात येऊन तेथे आदळतात. अनेकांना वाहने नियंत्रित करता येत नसल्याने ती नाल्यात पडतात. त्यामुळे अनेकांना इजा झाल्यात. वाहनांचेही नुकसान होत आहे. 

पुणे-बंगळूर महामार्गालगत केबल खोदाईमुळे शेतजमिनीचे नुकसान; वाहनचालकांसाठी धोकादायक स्थिती

याबाबत रस्त्याचे काम करणाऱ्या ठेकेदारास माहिती देण्यात आली. माजी सरपंच आप्पासाहेब देशमुख यांनी सुपरवायझरला रस्त्यावर उभे राहून कसे अपघात घडत आहेत, याचा प्रत्यक्ष अनुभव दिला. दुरुस्त करून घेतो, असे सांगून आता महिना झाला तरीही संबंधिताने दोन रस्त्यामधील सांधा जुळवून घेतलेला नाही. दोन्ही बाजूंनी रस्ता चांगला असल्याने वाहने वेगात येतात. अचानक रस्त्यावरील त्या खड्ड्यात आदळ आपट होऊन चालकाचे वाहनावरील नियंत्रण सुटून दररोज अपघात होत आहेत, अशी तक्रार मेडिकल कॉलेजचे उपाध्यक्ष दीपकराव देशमुख यांनी केली. 

संपादन : बाळकृष्ण मधाळे