मल्हारपेठ (जि. सातारा) : विहे (ता. पाटण) येथे गॅस्ट्रोच्या साथीमुळे ग्रामपंचायत व आरोग्य विभागाकडून प्रतिबंधात्मक उपाययोजना म्हणून टॅंकरने पाणीपुरवठा करण्यात आला. पाणीपुरवठा विहिरीतील पाण्याचे शुद्धीकरण करण्यात आले. साथ आटोक्‍यात आणण्यासाठी स्थानिक प्रशासन आणि आरोग्य विभागाचे प्रयत्न सुरू असून आत्तापर्यंत 90 जणांना त्रास झाला आहे. 

गेल्या चार, पाच दिवसांपासून विहे येथे पाणी दूषित असल्याने नागरिकांना उलट्या, जुलाबाचा त्रास होत असून विहे उपकेंद्रात रूग्णाच्या तपासण्या केल्या असता गॅस्ट्रोसदृष्य साथीची लागन झाली असल्याचे वैद्यकीय तपासातून निष्पन्न झाले. आत्तापर्यंत 90 जणांना लागण झाली असून गावात प्रतिबंधात्मक उपाययोजना म्हणून पाणी वितरण व्यवस्था करणाऱ्या पाईपलाईन, वॉल्व्ह, पाणी साठवण टाकी, पाणीपुरवठा विहीरीची साफसफाई कारण्यात येत आहे. 

सातारा जिल्ह्यातील पडळ बनले सुकन्या समृद्धी गाव; भारत सरकारच्या योजनेस 100 टक्के प्रतिसाद

दरम्यान, जिल्हा परीषद सदस्य विजय पवार व पंचायत समिती सदस्य सुरेश पानस्कर, आरोग्य विभागाचे डॉ. सुहेल शिकलगार यांनी गावास भेट देवून स्थानिक प्रशासनाशी चर्चा करुन परिस्थितीची पाहणी केली. साथीचे प्रमाण कमी होत असून घरोघरी नागरिकांचा सर्व्हे केला आहे. थोडे दिवस नागरिकांनी पाणी उकळून प्यावे, स्थानिक प्रशासनाच्या सुचनाचे पालन करावे, असे आवाहन वैद्यकीय अधिकारी डॉ. सुहेल शिकलगार यांनी केले आहे. पाणीपुरवठा विहीर व साठवण टाकीपासून काही अंतरावर वितरण वॉल्व्ह आहे. या ठिकाणचे दूषित पाणी पाइपमधून गेले असल्याची शक्‍यता आहे. विहरीतील गाळ काढून संपुर्ण पाणी क्‍लोरिनेशन केले आहे, अशी माहिती उपसरपंच अविनाश पाटील यांनी दिली. 

संपादन : बाळकृष्ण मधाळे