कऱ्हाड (जि. सातारा) : कृष्णा वैद्यकीय विज्ञान अभिमत विद्यापीठ आणि कोल्हापूर येथील शिवाजी विद्यापीठामध्ये नुकताच वैद्यकीय क्षेत्रातील संशोधनाबाबत सामंजस्य करार झाला. या करारांतर्गत दोन्ही विद्यापीठातील विद्यार्थी, प्राध्यापक, संशोधक व कर्मचारी हे एकत्रितपणे न्यूरोसायन्स, कर्करोगासह अन्य वैद्यकीय क्षेत्रातील संशोधन कार्यात सहभागी होणार आहेत.
 
कृष्णा अभिमत विद्यापीठाचे कुलपती डॉ. सुरेश भोसले व शिवाजी विद्यापीठाचे कुलगुरू डॉ. डी. टी. शिर्के यांच्या उपस्थितीत "कृष्णा'चे कुलसचिव डॉ. एम. व्ही. घोरपडे व "शिवाजी'चे कुलसचिव डॉ. विलास नांदवडेकर यांनी या करारावर सह्या केल्या. "कृष्णा'चे अतुल भोसले, अतिरिक्त संशोधन संचालक डॉ. डी. के. अगरवाल, समन्वयक डॉ. सतीश काकडे, धीरज माने, शिवाजी विद्यापीठाचे प्र- कुलगुरू डॉ. पी. एस. पाटील, समन्वयक प्रा. डॉ. के. डी. सोनवणे आदी उपस्थित होते. 

'रयत'च्या डॉ. भाऊसाहेब कराळे, डॉ. अरविंद बुरुंगलेंचा राजीनामा

डॉ. भोसले म्हणाले, ""शिवाजी विद्यापीठासमवेत होत असलेला हा सामंजस्य करार दूरगामी महत्त्वाचा आहे. या करारानुसार दोन्ही विद्यापीठांमध्ये विविध शैक्षणिक व संशोधकीय उपक्रम, संयुक्त प्रकाशने, माहितीची देवाणघेवाण, ग्रंथालयीन सहकार्य अशा अनेक दिशांनी सहकार्य होणार आहे.'' या करारामुळे शिवाजी विद्यापीठातील एमएस्सी इन मेडिकल इन्फॉर्मेशन मॅनेजमेंटच्या विद्यार्थ्यांना संशोधनासाठी आवश्‍यक वैद्यकीय सुविधांची उपलब्धता होईल. कृष्णा अभिमत विद्यापीठाच्या विद्यार्थ्यांनाही बायोइन्फॉर्मेटिक्‍स, मेडिकल इन्फॉर्मेशन मॅनेजमेंट, फार्मास्युटीकल मायक्रोबायॉलॉजी, बायोकेमिस्ट्री, पश्‍चिम घाटातील जैवविविधता, सामाजिक शास्त्रांमधील वैद्यकीय क्षेत्राला पूरक अशा बाबींचा अभ्यास व संशोधन करता येईल, असे डॉ. शिर्के यांनी नमूद केले. तृप्ती भोसले यांनी सूत्रसंचालन केले. डॉ. डी. के. अग्रवाल यांनी आभार मानले. 

संपादन : बाळकृष्ण मधाळे