सातारा : निवडणुकीच्या रणधुमाळीने गावात तेढ वाढू नये, निवडणुकीसाठी गावाचा पैसा खर्च होऊ नये यासाठी कोरेगाव तालुक्‍यात संस्कृती कलामंच या सामाजिक संस्थेच्या वतीने संपूर्ण ग्रामपंचायत बिनविरोध निवडून देणाऱ्या गावास "एक पेटी वाचनालय' तसेच सन्मानचिन्ह देऊन गौरवण्यात येईल, अशी योजना जाहीर करण्यात आली आहे. 

या बाबतची माहिती सामाजिक संस्थेचे अध्यक्ष यशेंद्र क्षीरसागर यांनी दिली. बिनविरोध ग्रामपंचायतीच्या गावातील सर्व इच्छुक तरुणांना मोफत स्पर्धा परीक्षा मार्गदर्शनाची सोय केली जाईल, अशीही घोषणा या योजनेत करण्यात आली आहे. गावामध्ये गट तसेच मतभेद असतील तर स्वयंपूर्ण तसेच सर्वस्पर्शी विकास होऊ शकत नाही. एकदिलाने आपले प्रतिनिधी निवडले तर संपूर्ण गाव एकत्र राहते आणि आदर्श गावाची निर्मिती होते. महाराष्ट्रात अनेक गावांनी तसा आदर्श घालून दिला आहे. अशा पद्धतीने बिनविरोध निवडणूक व्हावी म्हणून प्रोत्साहन देण्यासाठी ही योजना जाहीर करीत असल्याचे श्री. क्षीरसागर यांनी सांगितले. 

थर्टी फर्स्टच्या उत्साहास लगाम; सातारा जिल्ह्यातील हॉटेल, रेस्टाॅरंट, ढाब्यांना वेळेची मर्यादा

गावांसमोर अनेक आव्हाने असतात. या आव्हानांना सामोरे जाण्यासाठी सर्व गावाने मतभेद विसरून एकत्र यावे. व्यसनाधिनता, गुन्हेगारी, बेरोजगारी, पाणीप्रश्न असे अनेक प्रश्न सोडवायचे असतील तर एकत्र येणे गरजेचे आहे. त्यादृष्टीने ग्रामपंचायत निवडणूक बिनविरोध करणे हे महत्त्वाचे पाऊल ठरेल. तसा आदर्श ग्रामपंचायतींनी घालून द्यावा, यासाठी ही योजना जाहीर करण्यात येत आहे, असे पत्रकात म्हटले आहे. बिनविरोध निवडणुका करणाऱ्या गावात वाचण्याची संस्कृती आणि संस्कार रुजावे म्हणून सर्व प्रकारची पुस्तके तसेच सन्मानचिन्ह देऊन मान्यवरांच्या हस्ते या गावाचा सत्कार करण्यात येईल. तसेच गावातील सर्व तरुणांना स्पर्धा परीक्षा मार्गदर्शन मोफत विविध सत्रांमध्ये घेतले जाईल, असाही योजनेत समावेश आहे. गावकऱ्यांनी बिनविरोध निवडणुकीचा प्राधान्याने विचार करावा, असे आवाहन श्री. क्षीरसागर यांनी केले आहे. 

संपादन : बाळकृष्ण मधाळे