सातारा : जिल्ह्यात कोरोनाचा संसर्ग वाढत आहे. वाढत्या कोरोना संसर्गावर मात करण्यासाठी व्यापारी, किराणा दुकानदार, भाजी विक्रेत्यांनी चाचणी करून घेऊनच दुकानात बसावे. अशा कोरोना चाचण्या करण्यासाठी प्रशासनाकडून मिशन मोडवर काम केले जावे, तसेच लसीकरणाचा वेग वाढवा, अशा सूचना पालकमंत्री बाळासाहेब पाटील यांनी केल्या.
 
जिल्हाधिकारी कार्यालयातील परिषद सभागृहात आज कोरोना संसर्ग आढावा बैठक पालकमंत्री पाटील यांच्या प्रमुख उपस्थितीत झाली. या वेळी जिल्हाधिकारी शेखर सिंह, मुख्य कार्यकारी अधिकारी विनय गौडा, पोलिस अधीक्षक अजयकुमार बन्सल, अतिरिक्त जिल्हाधिकारी रामचंद्र शिंदे, जिल्हा शल्यचिकित्सक डॉ. सुभाष चव्हाण, जिल्हा आरोग्य अधिकारी डॉ. अनिरुद्ध आठल्ये उपस्थित होते. 

ऐतिहासिक कृष्णा घाटावर हुल्लडबाजीला बसणार चाप; प्रीतिसंगमावर 20 लाख खर्चून पोलिस चौकीची निर्मिती

यापुढे कोरोनाची चाचणी केल्यानंतर क्रांतिसिंह नाना पाटील रुग्णालयाकडून या तपासणीचा अहवाल मोबाईलवर एसएमएसच्या माध्यमातून लिंक मिळेल. त्या लिंकवर क्‍लिक केल्यानंतर संबंधिताला अहवाल प्राप्त होणार आहे. अशी यंत्रणा तयार करण्यात आली आहे. त्यामुळे आरटीपीसीआर केल्यानंतर लागणारा विलंब आता संपणार आहे. घरबसल्या सुविधा प्राप्त होणार आहे. त्यामुळे फार काळ ताटकळत बसण्याची गरज लागणार नाही. त्यामुळे जवळचे कोणी कोरोना पॉझिटिव्ह आले, तर उशीर न करता तुमचीही चाचणी करून घ्या, असे आवाहन पालकमंत्री पाटील यांनी केले. 

संभाजीराजेंच्या बलिदानानंतर रायगड 1689 मध्ये मोगलांच्या ताब्यात; कसा सोडविला खंडेरावांनी गड वाचा सविस्तर..

जिल्ह्यात कोरोना पॉझिटिव्हचा दर 16.21 असून, बरे होण्याचा दर 93.96 इतका आहे. मृत्यूचा दर 3.67 इतका आहे. कोरोना प्रतिबंधक लसीकरणासाठी आता लोक पुढे येत आहेत. वाढता प्रतिसाद पाहून जिल्ह्याने लशीची मोठ्या प्रमाणात मागणी राज्य शासनाकडे नोंदविली आहे. कोरोना संसर्ग रुग्णाच्या संपर्कात आलेल्या कमीतकमी 20 जणांची कोरोना चाचणी करून घ्यावी. ग्रामीण भागात या कामासाठी ग्राम दक्षता समितीने आणि शहरातील स्थानिक समित्यांनी प्रशासनाला मदत करावी, असेही पालकमंत्री पाटील यांनी सांगितले. 

वावरहिऱ्यात मुलांकडून वृक्षसंवर्धनाचा वसा; लॉकडाउनमध्ये जगवली तब्बल अडीच हजार झाडे

संपादन : बाळकृष्ण मधाळे