कऱ्हाड (जि. सातारा) : पुणे-मिरज ते लोंढा लोहमार्गाच्या दुहेरीकरणाठी संपादित शेतकऱ्यांच्या जमिनीचा मोबदला द्यावा. प्रकल्पग्रस्त शेतकऱ्यांच्या कुटुंबातील सदस्याला रेल्वेत नोकरी द्यावी, अशी मागणी खासदार श्रीनिवास पाटील यांनी लोकसभेत केली. लोकसभेच्या अर्थसंकल्पीय अधिवेशनाच्या तिसऱ्या सत्रात खासदार पाटील यांनी मागणी केली. त्यांनी जमीन अधिगृहणाच्या प्रलंबित प्रश्नांसह शेतकऱ्यांच्या प्रलंबित मागण्यांकडे सरकारचे लक्ष वेधले.
खासदार पाटील म्हणाले, "पुणे-मिरज-लोंढा लोहमार्गाच्या दुहेरीकरणाचे काम सध्या प्रगतिपथावर असून, त्यापैकी सुमारे 100 किलोमीटरचा लोहमार्ग सातारा लोकसभा मतदारसंघातून जातो. प्रकल्प मतदारसंघाच्या विकासाच्या दृष्टीने महत्त्वपूर्ण आहे. मात्र, प्रकल्पासाठी संपादित जमिनींचा मोबदला शेतकऱ्यांना दिला जावा, हेही तेवढेच महत्त्वाचे आहे. त्यासाठी शेतकऱ्यांना द्याव्या लागणाऱ्या निधीचा अर्थसंकल्पात समावेश होणे जरुरी आहे. विस्तारीकरण आणि विद्युतीकरण प्रकल्पाच्या कागदोपत्री नोंदी व प्रत्यक्षात असणाऱ्या जमिनींत मोठ्या प्रमाणावर विसंगती आहे.
ब्रिटिशकाळात मीटरगेज लाइन होती. त्याला 1967 मध्ये ब्रॉडगेज बनविली. त्यावेळेला काही ठिकाणांची वळणे काढून मार्ग सरळ करून घेतला होता. मात्र, त्यानुसार जमिनींचे रेकॉर्ड अद्ययावत केले गेले नाही. त्यावेळी जमीन अधिगृहण केले गेले की नाही, याचा ठोस आणि परिपूर्ण तपशील रेल्वेकडे नाही. विस्तारीकरण प्रकल्पाच्या कामासाठी खासगी कंपनीने सर्व्हे केलेला असून, त्यांच्या व भूमिअभिलेखच्या रेकॉर्डमध्ये तफावत आहे. त्यामुळे लोहमार्गाच्या दुतर्फा असलेले प्रकल्पग्रस्त मिळणाऱ्या मोबदल्यापासून वंचित राहण्याची शक्‍यता आहे.
त्याविषयी संपूर्ण 100 किलोमीटरचा लोहमार्गचा सर्व्हे महसूल व रेल्वे प्रशासनाने एकत्रितपणे केल्यास त्यातील तफावत दूर होईल. सर्व्हेनंतर किती जमीन संपादित करावी लागेल, तेही निश्‍चित होईल. त्यासाठी देण्यात येणाऱ्या निधीचा समावेश होणे जरुरी आहे. लोहमार्गामुळे दोन्ही बाजूला असणाऱ्या जमिनी, गावे, शहरे विभागली गेली आहेत. त्यामुळे येथे प्रत्येक दिवस लोहमार्ग ओलांडल्याशिवाय जनजीवन चालू शकत नाही. परंतु, पावसाळ्यात अनेक दिवस अंडरपास ब्रीज पाण्याखाली जातात. परिणामी ते बंद राहिल्याने स्थानिक नागरिकांची गैरसोय होते.''
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.