कोरेगाव (जि. सातारा) : जिल्ह्यात कोरोनाबाधित रुग्ण जास्त संख्येने आढळून येत असल्याच्या पार्श्वभूमीवर प्रतिबंधात्मक उपाययोजनेचा भाग म्हणून मोठ्या प्रमाणात गर्दी होणारे तालुक्‍यातील कोरेगाव, रहिमतपूर, वाठार स्टेशन, सातारारोड व पिंपोडे बुद्रुक या पाच मोठ्या गावांतील आठवडा बाजार येत्या 12 मार्चपर्यंत बंद ठेवण्याचा आदेश प्रांताधिकारी ज्योती पाटील यांनी काढला आहे. 

दरम्यान, दैनंदिन भाजी मंडई सुरूच राहणार आहे; परंतु या ठिकाणी गर्दी टाळण्यासाठी आणि सुरक्षित अंतर राखले जावे, यासाठी विक्रेत्यांना बसण्याच्या जागा आखून देण्याचे नियोजन करण्याच्या सूचना संबंधित गावांतील स्थानिक प्रशासनाला दिल्याची माहिती प्रांताधिकाऱ्यांनी दिली. 

कोयनेतील यात्रांत कोरोनाच्या संसर्गाचे विघ्न; सुमारे 15 गावांतील यात्रा रद्द

यासंदर्भातील आदेशात प्रांताधिकारी यांनी म्हटले आहे, की जिल्हाधिकाऱ्यांच्या निर्देशानुसार कोरेगाव तालुक्‍यातील कोरेगाव, रहिमतपूर, वाठार स्टेशन, सातारारोड व पिंपोडे बुद्रुक येथील आठवडा बाजार येत्या 12 मार्चपर्यंत बंद ठेवण्यात येत आहेत. यासंदर्भात रहिमतपूर नगरपालिका व कोरेगाव नगरपंचायतीचे मुख्याधिकारी, तसेच कोरेगाव, रहिमतपूर, वाठार स्टेशन, सातारारोड व पिंपोडे बुद्रुक येथील मंडल अधिकारी व तलाठ्यांनी आवश्‍यक ती कार्यवाही करावी, असे या आदेशात नमूद केले आहे. 

संपादन : बाळकृष्ण मधाळे