पाटण (जि. सातारा) : कऱ्हाड-चिपळूण महामार्गाचे काम गेली तीन वर्षे संथगतीने सुरू आहे. कामासाठी असणारी मुदतवाढ एल ऍन्ड टी कंपनीला अनेक वेळा दिली आहे. मात्र, कंपनीला काम पूर्ण करता आलेले नाही. लोकप्रतिनिधीतील सत्ताधारी आणि विरोधकांची गुपचिळी जनतेला नाहक त्रास देत आहे. संपूर्ण रस्ता अजून दोन वर्षे तरी पूर्ण होईल का, अशी शंका असून उखडलेल्या रस्त्यामुळे जनता व वाहनधारक हैराण झालेत.
या रस्त्याच्या कामास 2018 मध्ये सुरुवात झाली. नियोजनाचा बट्ट्याबोळ सुरुवातीपासूनच पाहिला मिळाला. कऱ्हाडपासून संगमनगर धक्क्यापर्यंत अनेक ठिकाणी रस्ता पहिल्याच वर्षी उखडला गेला. परंतु, काही ठिकाणी या उखडलेल्या रस्त्याचे काम आजही पूर्ण झालेले नाही. कऱ्हाड ते विहे घाट या अंतरातील काही ठिकाणचा अपवाद सोडला तर काम पूर्णत्वाकडे आणण्यात ठेकेदार कंपनीची दमछाक झाली आहे. मल्हारपेठ-कदमवाडी ते नवसरी, नाडे गावच्या हद्दीपासून तेलेवाडीपर्यंत, नवारस्ता ते अडुळ गावठाणापर्यंत, अडुळपेठ ते म्हावशी फाटा, पाटण ते तामकडे गावची हद्द आणि कराटे गावच्या हद्दीपासून मणेरी गौंड या अंतरातील काही भाग पूर्ण केला गेलेला आहे.
मात्र, राममळा ते विहेघाट या अंतरात शिल्लक राहिलेले काम प्रवाशांच्या जिवाशी खेळत आहे. अनेक पूल, मोऱ्या, गटार, संरक्षण भिंतीचे काम अपूर्ण आहे. रस्त्यासाठी लागणारी जमीन तीन वर्षे झाली तरी ताब्यात घेण्यात आलेली नाही. जमीन अधिग्रहणाचे काम अजून सुरूच आहे. रस्त्याशेजारील गावातील वीज वाहिन्यांची कामे हातात घेतली नसल्याने अनेक ठिकाणचे पोल रस्त्यातच उभे आहेत. त्यांना जोडणाऱ्या वाहिन्या लोंबकळत असल्याने कधी दुर्घटना घडेल, याची खात्री नाही. या मार्गावरून प्रवास करणाऱ्या वाहनधारकांबरोबर प्रवाशांनाही त्रास सहन करावा लागत आहे. लोकप्रतिनिधींची हाताची घडी आणि तोंडावर बोट अशा अवस्थेत असल्याने जनतेला कोणीही वाली उरला नाही. त्रस्त जनतेने आंदोलने करण्याचा प्रयत्न केला. मात्र, त्यांना तकलादू कारणे सांगून वेळ मारण्यात कंपनी प्रशासनाला आजपर्यंत यश आलेले आहे.
प्रशासन व कंपनीचा नाही ताळमेळ : कंपनीची कागदावरील यंत्रणा व प्रत्यक्षात काम करणारी यंत्रणा याचा कुणाला कोणाशी ताळमेळ नाही. राष्ट्रीय महामार्गाच्या कोल्हापूर विभागाकडे त्याचे पहिले काम होते. ते आता पुणे विभागाकडे दिले असून कायम बदललेल्या अधिकाऱ्यांचा स्थानिक प्रशासन व कंपनी प्रशासनाशी मेळ लागत नाही.
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.