सातारा : तीन महिने उलटूनही कोरोनाचे दुष्टचक्र थांबायला तयार नाही. लोकांतील भीतीचे वातावरणही कायम आहे. या पार्श्वभूमीवर कऱ्हाड तालुक्‍यातील प्राथमिक शिक्षकांनी एकत्र येत कोरोनाविषयक जनजागृती गीताची निर्मिती केली आहे. "सोशल मीडिया'वर सध्या हे गीत चांगलेच लोकप्रिय ठरले आहे.
 
मार्चच्या मध्यापासून कोरोनाने आपले हातपाय पसरायला सुरुवात केली. पुढे हा विळखा हळूहळू घट्ट झाला. आता तीन महिने उलटूनही कोरोनाची भीती कायम आहे. शासकीय पातळीवर कोरोनाचा मुकाबला करण्याच्या दृष्टीने विविध उपाययोजना सुरू आहेत. कोरोनाविषयक असणारी भीती दूर करण्याचे काम सुरू आहे. प्रतिबंधासाठी करावयाच्या उपाययोजनांची माहिती दिली जात आहे. या वाटचालीत प्राथमिक शिक्षकही मागे नाहीत. त्याचाच एक भाग म्हणून कऱ्हाड तालुक्‍यातील प्राथमिक शिक्षकांनी एकत्र येत कोरोनाविषयक जनजागृती गीताची निर्मिती केली आहे. 

"तू चाल पुढं तुला रं गड्या भीती कशाची, पर्वा बी कुणाची...'या जुन्या काळातील लोकप्रिय गीताच्या आधारे हे गीत तयार करण्यात आले आहे. उपक्रमशील शिक्षिका म्हणून ठसा उमटविणाऱ्या आगाशिवनगर येथील प्राथमिक शाळेच्या शिक्षिका सुरेखा वायदंडे- चव्हाण यांची ही संकल्पना आहे. मुबारक भालदार, उदय भंडारे, विजय गवळी, मुकुंद पन्हाळे, प्रमोद देवकुळे, महेश लोखंडे, गणेश दुबळे, नलिनी बैले, मीनाक्षी रसाळ, पद्मा कुंभार, गौतमी माने, आबासाहेब साठे, राजू कारंडे या शिक्षकांचा गीतात समावेश आहे. गुरुदास, आकाश क्षीरसागर, साईराज सूर्यवंशी यांनी या गीताचे संकलन केले आहे. या गीतात कोरोनाविरुद्धच्या मोहिमेत आघाडीवर राहून लढणाऱ्या डॉक्‍टर, नर्सेस, पोलिस आदी घटकांचा गौरव करण्यात आला आहे. नियमांना डावलून सर्वत्र गर्दी करू पाहणाऱ्यांचेही गीतात प्रबोधन करण्यात आले आहे. या गीताचा "सोशल मीडिया'वर चांगलाच बोलबाला आहे. शिक्षक वर्गातही हे गीत चांगलेच लोकप्रिय ठरले आहे. 

कोरोनाच्या या अभूतपूर्व संकटात प्रत्येक जण आपापल्या परीने निर्मूलनासाठी योगदान देत आहे. समाजाशी सातत्याने एकरूप असणारा घटक या नात्याने प्राथमिक शिक्षकही जनजागृतीच्या या मोहिमेत सहभागी झाले आहेत असे सुरेखा वायदंडे- चव्हाण (प्राथमिक शिक्षिका, शाळा- आगाशिवनगर, ता. कऱ्हाड) यांनी नमूद केले.

गुड न्यूज : कऱ्हाड तालुक्यात आजपर्यंत दाेनशे कोरोनामुक्त

पुढच्या बुधवारपासून तूरडाळ 55, तर चणाडाळ 45 रुपये किलो दराने मिळणार