कुकुडवाड (जि. सातारा) : माण तालुक्‍यातील कुकुडवाड परिसरातील शेतकऱ्यांनी जून महिन्याच्या सुरवातीस मृग नक्षत्रात झालेल्या पावसाच्या ओलीवर काही प्रमाणावर पेरण्या उरकल्या होत्या. काही शेतकरी चांगल्या पावसाच्या प्रतीक्षेत होते. मागील तीन दिवसांपासून झालेल्या दमदार भीज पावसाने पेरणी केलेल्या पिकास जीवदान मिळालेलं आहे, तर राहिलेल्या शेतकऱ्यास पेरणी करण्याची संधी उपलब्ध झाली आहे. 

कुकुडवाड परिसरातील वळई, पानवण, विरळी, चिलारवाडी, शेणवडी या गावांमध्ये जून महिन्यात सुरुवातीस झालेल्या पावसाच्या ओलीवर शेतकऱ्यांनी काळ्या आईची ओठी भरून जणू मातीशी झुगारचं खेळला होता. काही शेतातील पिके उगवून आली होती, तर काही पिके उगवतील, की नाही अशा परिस्थितीत होती. त्यामुळे शेतकरी हवालदिल झाला होता; पण मागील तीन- चार दिवस झालेल्या पावसाने शेतकरी संतुष्ट झाला आहे. त्यामुळे दुबार पेरणीचे संकट टळले आहे.

हा पाऊस जरी पडला असला, तरी तरी उद्याच्या भविष्याची चिंता मात्र काहीशी कमी झालेली नाही. अद्यापही या परिसरातील ओढे, नाले, पाझर तलाव आणि विहिरी पूर्ण क्षमतेने भरल्या नसल्याने आणि यापुढे पावसाने पाठ फिरवली तर पिकास पाणी पुरणार का? असा प्रश्‍न आहे. 

मागील चार ते पाच वर्षांपासून लहरी हवामान, बेमोसमी पाऊस आणि सततचा दुष्काळ यामुळे येथील शेतकरी त्रासला आहे. यातच कोरोनाच्या महामारीमुळे शेतकऱ्यांचे आर्थिक गणित चांगलेच बिघडले आहे. यावर्षी मात्र खरिपाची जोरदार तयारी केलेली आहे. निसर्गाने अशीच चांगली साथ दिली तर शेतकऱ्यांची चिंता मिटेल, असे मत शेतकरी व्यक्त करत आहेत. 

शरद पवार म्‍हणाले, देशाच्‍या सुरक्षेचा प्रश्‍न राजकारणापलीकडचा