रेठरे बुद्रुक (जि. सातारा) : ही वस्तूस्थिती आहे, दुशेरे (ता. कऱ्हाड) येथील सुभाष पांडूरंग जाधव व त्यांचा मुलगा प्रशांत कष्टाने बहरवलेल्या वनराईची. तीन वर्षांपूर्वी त्यांनी नापिक असणाऱ्या 11 गुंठ्यांतील बाभळी काढून त्यात फळबाग लागवड केली. आजमितीस त्या जमिनीचे रुपच पालटून गेले आहे. नापिक जमिनीचे फळबागेत झालेले रूपांतर पाहून अन्य शेतकऱ्यांना जाधव पिता- पुत्रांची धडपड प्रेरणादायी ठरत आहे. 
श्री. जाधव व मुलगा प्रशांत यांनी 2017 मध्ये नदीलगत उताराची जमीन हाताखाली आणण्याचा विचार केला. त्यावेळेस वर्षानुवर्षे उभ्या असलेल्या बाभळी काढण्याचे आव्हान त्यांच्यासमोर होते. त्या त्यांनी लाकूड वखार व्यावसायिकास काढून दिल्या. तत्कालीन तालुका कृषी अधिकारी दत्तात्रय खरात व कृषी सहाय्यक एम. आय. शेख यांच्या मार्गदर्शनाखाली व शिफारशीनुसार खड्डे घेऊन त्यात खत भरणी केली. काशीळ येथील शासकीय रोपवाटिका व उपलब्ध ठिकाणाहून फळझाडे आणली.

रोपे लावणीनंतर संपूर्ण शेतीला तारेचे कुंपण घेतले. सुरवातीचे सहा महिने रोपांना बादलीने पाणी दिले. त्यानंतर सर्व रोपांना ठिबक सिंचन पद्धतीने पाणी सुरू केले. रोपे, कुंपण व ठिबक सिंचनासाठी 30 हजार रुपये खर्च केले. त्या दोघांच्या परिश्रमातून तेथे नारळ, आंबा, शेवगा, चिकू, डाळिंब, लिंबू, सिताफळ, पेरू, आवळा, देशी केळी, रामफळ, कडीपत्ता, जांभूळ आदींची फळबाग बहरली आहे. पावसाळ्यात पुराच्या पाण्याखाली जाणाऱ्या या जमिनीत बहरलेली फळबाग आदर्शवत ठरत आहे.

सुरुवातीस शेवगा, नारळातील आंतरपीक देशी केळीचे दहा ते बारा हजाराचे उत्पन्न मिळाले. आजमितीला केळी, पेरू, सिताफळ व शेवग्याचे उत्पन्न मिळत आहे. सुभाष जाधव व प्रशांत यांच्या कष्टाला श्री. जाधव यांचे मोठे चिरंजीव नितीन यांची साथ मिळत आहे. गेल्यावर्षी महापुरात आंबा, नारळ व शेवग्याच्या झाडांची हानी झाली. शासनदप्तरी फळबागेची नोंद असूनही ते नुकसान भरपाईपासून अद्याप वंचित राहिले आहेत.