उंडाळे (जि. सातारा) ः कोरोनाच्या पार्श्वभूमीवर येथील स्वातंत्र्यवीर दादासाहेब उंडाळकर विद्यालयातील राष्ट्रीय हरीत सेनेच्या वतीने व्हॉट्‌सऍप ग्रुपवरून विद्यार्थ्यांना वृक्षारोपण करावे असे, आवाहन केले होते. या ऑनलाइन वृक्षारोपण महोत्सवात विद्यार्थी व पालकांनी "सेल्फी वुईथ ट्री' या संकल्पनेस उत्स्फूर्त प्रतिसाद दिला. त्यामध्ये सुमारे 250 झाडांची लागवड करण्यात आली. 

कोरोनामुळे मार्च महिन्यापासून सर्व विद्यालय बंद आहेत. त्यामुळे शिक्षण व सहशालेय उपक्रमापासून विद्यार्थी वंचित होते. त्यावर प्राचार्य बी. पी. मिरजकर, पर्यवेक्षक बी. आर. पाटील यांनी शिक्षकांची झूम ऍपद्वारे ऑनलाइन मीटिंग घेऊन इयत्ता पाचवी ते दहावीपर्यंतच्या वर्गाचे व्हॉट्‌सअप ग्रुप करण्याचे सांगितले. त्यावर घरचा अभ्यास, ऑनलाइन व्हिडीओ, पीडीएफद्वारे विद्यार्थ्यांना शिक्षणाच्या प्रवाहात सामील करून घेतले जाते. दररोज सकाळी हा अभ्यास पाठविला जातो, विद्यार्थी हा अभ्यास पूर्ण करून तो शिक्षकांना पाठवितात. 

याच व्हॉट्‌सअप ग्रुपवरून राष्ट्रीय हरित सेनेच्या वतीने प्रतिवर्षीची परंपरा राखत प्रत्येक विद्यार्थ्यास आपल्या परसबागेत शेताच्या बांधावर वृक्ष लागवड करण्याचे आवाहन करण्यात आले होते. या आवाहनास विद्यार्थी, पालकांनी उत्स्फूर्त प्रतिसाद दिला. वृक्षाबरोबर विद्यार्थ्यांनी आपला फोटो ग्रुपवर पाठवत. आतापर्यंत सुमारे 250 पेक्षा जास्त वृक्षांची लागवड विद्यार्थ्यांनी केली. 

(संपादन ः संजय साळुंखे) 

ऑनलाईन पद्धतीने निधी न काढल्याने 28 कोटी गेले परत