कऱ्हाड/पाटण : वातावरणातील बदलामुळे पावसाची सातत्याने हजेरी लागत आहे. त्यामुळे शेतातील कामे रखडली होती. दोन दिवसांपासून अधून-मधून त्याचे आगमन होत असल्याने शेतकऱ्यांनी काबाडकष्ट करून पिकवलेल्या भाजीपाला-पालेभाज्यांच्या पिकांना फटका बसणार आहे. रब्बी हंगामातील पिकांवर व ऊस लागणी व तोडणीवर त्याचा परिणाम होणार आहे.

कमी दाबाच्या पट्ट्यामुळे अवकाळी पाऊस नोव्हेंबर महिन्यात आठ दिवस कमी-अधिक प्रमाणात पडला. काही दिवस विश्रांती घेतलेल्या पावसाने रात्रीपासून हजेरी लावली आहे. त्यामुळे रब्बी हंगामातील ज्वारी, गहू व हरभरा या पिकांवर त्याचा परिणाम होणार आहे. खरीप हंगामातील रखडलेली काढणी मिळालेल्या उघडिपीत पूर्णत्वाकडे गेली असली तरी नोव्हेंबरमधील पडलेल्या पावसामुळे रखडलेल्या उसाच्या लागणी आज पडलेल्या पावसामुळे पुढे ढकलणार आहेत.

पुन्हा पाठीमागे आठ दिवस पडलेल्या पावसामुळे लागणीसाठीची पूर्वमशागतीची व तयार झालेल्या शेतात उसाची लागण करण्याची कामे खोळंबली आहेत. गेली आठ दिवस पावसाने उघडीप दिली होती त्यामुळे उसाच्या लागणीस वेग आला असता. मात्र, पुन्हा पाऊस पडू लागला असल्याने व्यत्यय आला आहे. भाताच्या काढणीनंतर तालुक्याच्या पश्चिम भागातील विशेषत: जिराईत विभागातील शेतकरी जानेवारी ते जुलैपर्यंत जनावरांना लागणाऱ्या सुक्या चाऱ्यासाठी डोंगर उतारावरील गवत कापणीच्या कामाला लागतो.

मात्र, गेले १५ दिवस ढगाळ वातावरण व पडणारा पाऊस यामुळे गवत कापणीला सुरुवात केलेली नाही. पाऊस असाच काही दिवस पडत राहिला तर हे गवतही कुजून जाण्याची भीती निर्माण झाली आहे. दोन दिवसांपासून अधून-मधून त्याचे आगमन होत असल्याने शेतकऱ्यांनी काबाडकष्ट करून पिकवलेल्या भाजीपाला-पालेभाज्यांच्या पिकांना फटका बसणार आहे. रब्बी हंगामातील पिकांवर व ऊस लागणीवर त्याचा परिणाम होणार आहे.