कातरखटाव (जि. सातारा) : सामाजिक, राजकीय द्वेषापोटी गावोगावी मतभेदाच्या भिंती तयार झाल्या आहेत. या मत व मनभेदाच्या भिंती तोडून गावामध्ये एकीचे वातावरण निर्माण करण्याबरोबर परिसरात निसर्गाचे चांगले संतुलन राखण्याचा संकल्प डाळमोडी (ता. खटाव) येथील शेकडो युवकांनी केला आहे. 

दोन वर्षांपूर्वी डाळमोडीत किरण निकम, अजित माने आणि सचिन घाडगे या तरुणांनी राजकरण बाजूला ठेऊन गावातील तरुणांना एकत्र करून वृक्षारोपणाचे काम हाती घेतले. मागील वर्षी व यावर्षी मिळून 110 झाडांचे रोपण आणि वृक्षसंवर्धनाच काम या तरुणांनी स्वखर्चातून सुरू केले आहे. झाडांना पाणी देण्यासाठी गावातील आकाश पाटोळे व अमोल पाटील हे स्वतःचा टॅंकर व ट्रॅक्‍टर विनामूल्य देत आहेत. नोकरीनिमित्त बारामती येथे असणारे डॉ. एच. एस. पाटील, हरिदास चौधरी, संतोष माने हे तरुणांना वृक्षसंवर्धनासाठी लागेल ती मदत करत आहेत. आतापर्यंत या "टीम'ने 30 हजारांवर खर्च केला आहे. गावाच्या वनीकरणात या "टीम'ने मोठ्या होणाऱ्या वृक्षांच्या सुमारे तीन हजार बियांची लागवड केली आहे. 

दरम्यान, या उपक्रमात पूर्ण वर्षभर झाडांची निगा राखण्यासाठी अजित चौधरी, अक्षय चौधरी, भूषण घाडगे, गजानन निकम, प्रमोद पाटोळे, आकाश चौधरी, नानासाहेब चौधरी, रूपेश माने, सुभाष चौधरी, विठ्ठल चौधरी, श्रीकांत निकम, विशाल चौधरी, अनिकेत चौधरी, योगेश माने, सुशांत चौधरी, पवन चौधरी, सुशांत खोडसे, ओंकार चौधरी, भरत चौधरी, महेश पाटोळे, काकासाहेब पाटोळे, विशाल निकम, सौरभ घाडगे, सागर घाडगे, लक्ष्मण शिंदे, किरण निकम, सुमित निकम, आण्णा रायते, अर्जुन शिबे, सागर शिबे, शुभम चौधरी, तुषार माने, बबन देशमुख, गणेश चौधरी, निखिल निगडे, यशवंत जाधव, अक्षय शिबे यांचा सिंहाचा वाटा आहे. 

पहिला वर्धापन दिन साजरा 

दरम्यान, वृक्षरोपण उपक्रमाचा पहिला वर्धापन दिन नुकताच साजरा करण्यात आला. या वेळी संजय गांधी निराधार योजनेचे अध्यक्ष विजय शिंदे, माजी सरपंच विष्णुपंत निकम, राजेश निकम, बाबा शिंदे, धनंजय क्षीरसागर उपस्थित होते. 

संपादन : पांडुरंग बर्गे