शिखर शिंगणापूर (जि. सातारा) :  श्रावण महिन्यात येथील महादेवाच्या दर्शनासाठी येणाऱ्या भाविकांची संभाव्य गर्दी रोखण्यासाठी प्रशासन यंत्रणा सज्ज झाली आहे. कोरोना संसर्गापासून गावाचे संरक्षण करण्यासाठी ग्रामपंचायत व कोरोना समिती, पोलिस प्रशासन बाहेरून गावाहून येणाऱ्या भाविकांना एक हजार रुपये कर स्वरुपात दंड आकारणार आहे.
अखेर 'त्या' विवाह सोहळा आयोजकांवर गुन्हा 

त्यासाठी गावात तीन ठिकाणी चेकपोस्ट उभारण्यात आले असून, पोलिस व ग्रामपंचायत कर्मचाऱ्यांचा बंदोबस्त तैनात करण्यात आला आहे. कोरोनाच्या पार्श्वभूमीवर श्रावण महिन्यात बाहेरील व्यक्तींना गावात येण्यास प्रतिबंध करण्यात आला आहे. 

श्री शंभू महादेवाची श्रावण महिन्यात अभिषेक देवदर्शनासाठी लोक गर्दी करू पाहात आहेत. नैमित्तक देवपूजेशिवाय अद्याप मंदिर बंदच आहेत. पर्यटन, देवदर्शनासह सर्व व्यवहार शिंगणापूरमध्ये बंद आहेत. त्यासाठी ग्रामपंचायत, दक्षता समिती आणि पोलिस प्रशासन सतर्क झाले आहे. सहायक पोलिस निरीक्षक राजकुमार भुजबळ यांनी कठोर कारवाईचे आदेश शिंगणापूर पोलिस दूरक्षेत्रास दिले आहेत. त्यामुळे आरोग्याचे नियम न पाळणाऱ्याबरोबरच शिंगणापूरमध्ये एन्ट्री करणाऱ्यास दंडात्मक कारवाईस सामोरे जावे लागणार आहे. 
संपादन - संजय शिंदे