उंडाळे : घोगाव येथील संतकृपा शिक्षण संस्था आणि मातोश्री सहकारी पतसंस्थेचे संस्थापक अशोक भावके यांचे मंगळवारी रात्री अपघाती निधन झाले. घोगाव गावाजवळून जाणाऱ्या महामार्गावर उभे असताना त्याना कारने धडक दिली. त्यांच्या निधनाने परिसरावर शोककळा पसरली आहे.

श्री. भावके यांनी 1995 ला कऱ्हाड दक्षिण विधानसभा मतदारसंघातून निवडणूक लढवली होती. तेथून त्यांच्या राजकारणाची सुरूवात झाली. त्यानंतर त्यानी संतकृपा शिक्षण संस्था स्थापन केली. ग्रामीण भागातील विद्यार्थ्यांना इंजिनिअरिंगच्या शिक्षणाची सोय उपलब्ध करून दिली होती. मातोश्री सहकारी पतसंस्थेच्या माध्यमातून त्यांनी अनेक गरजूंना मदत केली होती. काही वर्षांपासून राजकारणापासून अलिप्त राहून त्यानी पुणे आणि मुंबई येथे बांधकाम व्यवसायात जम बसवला होता. माजी मुख्यमंत्री मनोहर जोशी यांचे निकटवर्तीय म्हणून त्यांना ओळखले जाते. काल (मंगळवारी) रात्री ते घोगाव येथे आले होते. रस्तकडेला उभे राहिले असताना त्यांना कारने धडक दिली त्यातच त्यांचा मृत्यू झाला.