कऱ्हाड : विरोधकांनी आतातरी रडीचा डाव खेळणे बंद करावे. निकालावर आक्षेप असेल तर सर्वोच न्यायालयात जावून न्याय मागावा. तिथे सुनावणी होईल आणि न्यायालय निकाल देईल. दररोज काही तरी नवीन काढून वक्तव्य करायचे, कागद दाखवायचा हे बरोबर नाही, अशी टीका अॅड. अनिल परब (Anil Parab) यांच्यावर उत्पादन शुल्क मंत्री शंभूराज देसाई (Shambhuraj Desai) यांनी केली.

न्यायदेवतेने आम्हाला न्याय दिलेला आहे. न्यायदेवतेवर आमचा पूर्ण विश्वास आहे, असेही ते म्हणाले. शिवसेना आमदार अपात्रता याचिका निकालात विधानसभा अध्यक्ष राहुल नार्वेकर यांनी एकनाथ शिंदे यांच्या नेतृत्वातील शिवसेना पक्ष असल्याचा निकाल देत भरत गोगावले यांची प्रतोदपदी नियुक्ती वैध ठरवली.

शिवसेना ठाकरे गटाने निवडणूक आयोगाकडे पक्षाची २०१८ मधील नवीन घटना सादर केली नसल्याच्या मुद्यावर नार्वेकर यांनी हा निकाल दिला. मात्र, शिवसेना ठाकरे गटाचे नेते अॅड. अनिल परब यांनी विधानसभा अध्यक्षांचा दावा खोटा असल्याचे सांगितले. त्यावर प्रतिक्रिया देताना मंत्री देसाई बोलत होते.

देसाई पुढे म्हणाले, पक्षाच्या घटनेत बहुमताने बदल करायचे असतील तर राष्ट्रीय कार्यकारणीची सभा घ्यावी लागते. त्याच्या विषय पत्रीकेवर विषय नमूद करावा लागतो. बहुमताने तो विषय मंजूर झाला तर त्यात सुधारणा घटनेत केल्यानंतर राज्य निवडणूक आयोग, केंद्रीय निवडणूक आयोगाची दुरुस्तीला मान्यता घेण्यसाठी ती सादर करावी लागते. निवडणूक आयोगाला त्यासंदर्भात काही शंका असल्यास पक्षाच्या प्रमुखांना विचारतात.

विधानसभा अध्यक्षांनी आमदार अपात्रतेचा निकाल दिला आहे. त्यावर आक्षेप असेल तर सर्वोच्य न्यायालयात जावे. आमची सुनावणी, साक्षी पुरावे, जबाब होवून विधासभा अध्यक्षांनी निकाल दिला आहे. विरोधकांनी रडीचा डाव खेळण्यापेक्षा सर्वोच्य न्यायालयात जावून न्याय मागावा, असेही त्यांनी स्पष्ट केले.