सातारा : भेसळयुक्त पदार्थ ग्राहकांना विकले जाऊ नयेत, यासाठी विक्रेत्यांच्या पदार्थांची व परवान्यांची तातडीने तपासणी करावी, असे निवेदन शहर शिवसेनेच्या वतीने शहरप्रमुख निमिश शहा आणि त्यांच्या सहकाऱ्यांनी अन्न आणि औषध प्रशासन विभागाच्या सहायक उपायुक्तांना नुकतेच दिले आहे. दिवाळी आणि आगामी काळातील यात्रा-जत्रांच्या पार्श्‍वभूमीवर हे निवेदन देण्यात आले आहे. 

ग्राहकांना चांगले पदार्थ मिळावेत, यासाठी मिठाई, बेकरींची तपासणी करावी, तसेच मंडईत कडधान्याला रंग लावून विक्री सुरू आहे, तसेच दुधातही भेसळ होत आहे. गुटखा विक्रीही बंद करावी. त्याबाबत कार्यवाही करावी. किराणा दुकानातही भेसळयुक्त कच्चामाल विकला जातो. प्रशासनाने अचानक धाडी घालून नमुने तपासणीला घ्यावेत व नागरिकांना शुद्ध माल, पदार्थ मिळतील असा दिलासा द्यावा. अन्यथा तीव्र आंदोलन केले जाईल, असा इशारा या वेळी निवेदनाद्वारे दिला आहे. निवेदन देताना श्री. शहा, तसेच उपशहरप्रमुख सयाजी शिंदे, मितीन लकेरी, ऍड. उमेश लकेरी, मनोज बोंडे आणि कार्यकर्ते उपस्थित होते. 

राजकीय मतभेदानेच कोयना, कृष्णा अस्वच्छ; कऱ्हाडात स्वच्छता मोहिमेलाच तिलांजली

संपादन : बाळकृष्ण मधाळे