सातारा : पुणे-बंगळुरु राष्ट्रीय महामार्गावर (Pune-Banglore Highway) सहा वाहनांचा विचित्र अपघात झाल्याची घटना आज मंगळवारी (ता.तीन) रात्री साडेआठ वाजता घडली. ही घटना शिरवळ-धनगरवाडी (मोटेवस्ती) हद्दीत घडली आहे. यात दोघांचा जागीच मृत्यू, तर तीन जण जखमी झाले आहेत. या अपघातामुळे (Accident In Satara) राष्ट्रीय महामार्गावरील वाहतूक थांबली होती. घटनेची माहिती मिळताच खंडाळा पोलिस अपघातस्थळी दाखल झाले आहेत. धनरवाडी येथील युवकाने ट्रॅक्टरच्या मदतीने वाहने बाजूला केली. कारमधील मृतांना बाहेर काढण्यात आले. तसेच इतर दोन वाहनांमधील पाच जण किरकोळ जखमी झाले आहेत. त्यांना उपचारासाठी खासगी रुग्णालयात दाखल करण्यात आले आहे.

सदरील घटनेविषयी सविस्तर माहिती अशी, की सातारहून पुण्याकडे जाताना शिरवळजवळील धनगरवाडी हद्दीतील निप्रो कंपनीजवळ सहा वाहनांचा विचित्र अपघात झाला. पुणे-बंगळूरु राष्ट्रीय महामार्गावर एक तास वाहतुकीचा खोळंबा झाला होता. पुण्याकडे जाताना सर्व्हिस रस्त्यावर वाहने धिम्म्या गतीने धावत आहेत. भरधाव वेगामुळे सदरील अपघात झाल्याची शक्यता वर्तवली जात आहे. मृतांची कोळकर व कुलकर्णी असे आडनाव सांगितले जात आहे.