कास : कास पठाराचा (Kas Pathar Satara) हंगाम संपल्यानंतर कास पठार कार्यकारी समितीमार्फत कास पठारावर निसर्ग पर्यटन सुरू करण्यात आले आहे. या निसर्ग पर्यटनाला पर्यटकांचा उत्स्फूर्त प्रतिसाद मिळत आहे.

कासवरील पर्यटन बारमाही सुरू राहावे, यासाठी वन विभागाच्या सहकार्याने हा उपक्रम सुरू केला आहे. त्याचाच एक भाग म्हणून कास पठारावर असणारी निसर्गाची अद्‌भूत रूपे, गुहा, तळी तसेच काही रहस्यमय ठिकाणे पाहण्याची संधी पर्यटकांना कास पठार समिती आणि वन विभागाच्या (Forest Department) संयुक्त विद्यमाने निसर्ग पर्यटनाच्या माध्यमातून उपलब्ध झाली आहे.

गेल्या आठवड्याभरात या ठिकाणी बऱ्याच पर्यटकांनी भेट देऊन कास पठारावरील दिसणारी निसर्गाचे रूपे तसेच रहस्यमय ठिकाणं पाहून समाधान व्यक्त केले. निसर्ग पर्यटनात सुरू केलेले पॉइंट पायी चालत अथवा जीप सफारीतून सुद्धा अनुभवू शकतो. जीप सफारीतून दिसणारी निसर्गाची अद्‌भूत सफर आणि त्यात दऱ्याखोऱ्याची माहिती असणारे अनुभवी गाइड यामुळे जीप सफारीत बसून पर्यटक निसर्गाचा सुंदर आविष्कार अनुभवत आहेत.