उंडाळे (सातारा) : दुचाकीवरून जाताना चक्कर येऊन धरणात (Undale Dam) पडलेल्या पिता पुत्राला वाचविण्यात यश आले. येथील बंधाऱ्यावर काल दुपारी साडेतीनच्या सुमारास ही घटना घडली. पितापुत्राचा सुधीर रामचंद्र पाटील यांनी धरणात उडी घेऊन जीव वाचविला. त्यामुळे सुधीर पाटील यांचे कौतुक होत आहे. सुनील महादेव पाटील व त्यांचा मुलगा अथर्व (दोघे रा. येळगाव) असे जीव वाचलेल्या पितापुत्राची नावे आहेत.

दुपारची साडेतीनच्या सुमारास येळगाव येथील सुनील पाटील हे आपला मुलगा अथर्वला घेऊन दुचाकीवरून उंडाळ्याकडून येळगावला निघाले होते. उंडाळे धरणावरील पुलावरून जाताना सुनील पाटील यांना चक्कर आली. वेगात ते गाडीसह धरणात पडले. देशीबन फार्मर प्रोड्युसर कंपनीचे अध्यक्ष सुधीर पाटील यांनी त्यांना धरणात पडताना पाहिले.

त्यांनी तत्काळ घटनास्थळावर धाव घेत क्षणाचाही विलंब न करता अंगावरील कापड्यासह पाण्यात उडी टाकून त्या पितापुत्राला पाण्यातून बाहेर काढले. अनेकांनी मोबाईल काढून त्याचे चित्रीकरण केले; पण सुधीर यांनी मोबाईलसह पाण्यात उडी मारून माणुसकी जिवंत असल्याचा प्रत्यय आणून दिला. दिवाळीच्या दिवशी नवीन कापड्यासह खिशातील मोबाईलचा विचार न करता पाण्यात उडी टाकून जी तत्परता व माणुसकीचे दर्शन घडवून पिता पुत्राचे प्राण वाचवले. त्यामुळे त्यांचे सर्वत्र अभिनंदन होत आहे.