वाई : मांढरदेव (ता. वाई) येथील श्री काळेश्वरी देवीच्या मंदिराकडं (Mandhardevi Kalubai Mandir) जाणाऱ्या मुख्य रस्त्याचं काॅंक्रिटीकरणाचं काम सध्या युद्धपातळीवर सुरु आहे. मात्र, भाविकांना यातून मार्ग काढताना त्रास सहन करावा लागत आहे. त्यामुळं होणारी गैरसोय टाळण्यासाठी रविवार (ता. ७) ते गुरुवार (ता. ११ जानेवारी) पर्यंत देवीचे मंदिर बंद ठेवण्याचा निर्णय देवस्थान ट्रस्टनं (Devasthan Trust) घेतला आहे.

मांढरदेव येथील काळेश्वरी देवीची वार्षिक यात्रा येत्या (Kaleshwari Devi Yatra) २५, २६ व २७ जानेवारी २०२४ या कालावधीत होणार आहे. या काळात महिनाभर महाराष्ट्र व अन्य राज्यातील लाखो भाविक देवीच्या दर्शनासाठी गडावर येत असतात. या पार्श्वभूमीवर भाविकांना चांगल्या सोयी-सुविधा देण्याच्या उद्देशानं देवस्थान ट्रस्ट व शासनाच्या वतीनं विविध विकासकामे हाती घेण्यात आली आहेत.

ट्रस्टच्या माध्यमातून मंदिर परिसर सुशोभीकरण करण्यात येत आहे. त्यासाठी मंदिराच्या उत्तरेकडील दुकाने मागे सरकवून संपूर्ण परिसर मोकळा करण्यात आला आहे. तसेच मंदिराकडे जाणाऱ्या मुख्य रस्त्यावरील अतिक्रमणे काढण्यात आली आहेत. मंदिराकडे जाणाऱ्या चढणी पायऱ्यांचे काम पूर्ण झाले असून उतरणी पायऱ्यांचे काम यात्रेपूर्वी पूर्ण करण्यात येणार आहे.

शासनाच्या वतीने भोर सार्वजनिक विभागामार्फत 'भोर - मांढरदेव - वाई' या रस्त्याचे रुंदीकरण काम प्रगतीपथावर आहे. याशिवाय, गावातील तळ्यापासून मंदिराकडे जाणाऱ्या मुख्य रस्त्याच्या कॉंक्रिटीकरणाचे काम युद्धपातळीवर हाती घेण्यात आले आहे. त्यामुळे भाविकांची होणारी गैरसोय टाळण्यासाठी देवीचे मंदिर रविवार (ता. ७) ते गुरुवार (ता. ११ जानेवारी) पर्यंत बंद ठेवण्याचा निर्णय देवस्थान ट्रस्टने घेतला असल्याची माहिती सूत्रांनी दिली.