Koregaon Accident Case : कारची धडक बसल्याने कोलवडी (ता. कोरेगाव) येथे एका बारा वर्षे वयाच्या मुलीचा मृत्यू झाला आहे. काल रात्री साडेसातच्या सुमारास हा अपघात झाला आहे. ग्रामस्थांनी दिलेल्या माहितीनुसार, जान्हवी सतीश जगदाळे असे मुलीचे नाव आहे.

ग्रामस्थांचे म्हणणे आहे, की ड्रंक अँड ड्राईव्ह, हिट अँड रन (Hit and Run) असे हे प्रकरण असून या कारने पुढे १५ फुटांवर जाऊन आणखी दोन दुचाकीस्वारांना धडक दिली. ते दोघेही दुचाकीस्वार सातारा येथील यशवंत पाटील हॉस्पिटलमध्ये उपचारासाठी दाखल आहेत.

अपघात करणारी कार गाडी भीमनगर येथे एका उसाच्या शेतात आढळून आली असून, संबंधित दुचाकीस्वार फरारी आहे. सातारा येथील सिव्हिल हॉस्पिटलमध्ये (Civil Hospital) शवविच्छेदन झाले आहे, पण संतप्त झालेल्या नातेवाइकांनी आरोपी अटक होईपर्यंत मृतदेह स्वीकारणार नाही, अशी भूमिका घेतली आहे. सध्या कोलवडीचे ग्रामस्थ सातारा येथील सिव्हिल हॉस्पिटलमध्येच थांबून आहेत.