नागठाणे (सातारा) : परिसरातील सासपडे व पाडळी (निनाम, ता. सातारा) येथे दोन वेगवेगळ्या घटनांत दोघांनी गळफास घेऊन आत्महत्या केली. पोलिसांकडून (Nagthane Police) मिळालेल्या माहितीनुसार, सासपडे येथील सतीश पोपट कांबळे (वय ४०) यांनी आज दुपारी आत्महत्या केली.

ते नातेवाईंकाच्या घराशेजारीच एकटेच राहत होते. त्यांच्या दारूच्या व्यसनामुळे व घरगुती कारणामुळे त्यांची पत्नी व मुलगी माहेरीच राहत होते. दुपारी अडीचच्या दरम्यान सतीश हे जेवण घेण्यासाठी न आल्यामुळे नातेवाईक त्यांच्या घरी पाहण्यासाठी गेले. घराचा दरवाजा आतून बंद असल्याने त्यांनी खिडकीतून पाहिले असता घराच्या लोखंडी अँगलला ओढणीच्या साहाय्याने सतीश यांनी गळफास घेऊन आत्महत्या केल्याचे निदर्शनास आले. योगेश अवघडे यांनी बोरगाव पोलिस ठाण्यात खबर दिली. हवालदार राजू शिखरे तपास करत आहेत.

दुसऱ्या घटनेत पाडळी (निनाम) येथील नितीन आनंदराव शिंदे (वय ३७) या युवकाने लग्न होत नसल्यामुळे दारूच्या नशेत गळफास घेऊन आत्महत्या केली. नितीनने आज सकाळी गावालगत असलेल्या शेतीफार्म शिवारात असलेल्या लिंबाच्या झाडाला नायलॉनच्या दोरीने गळफास घेतला. उत्तम विभूते (रा. नागठाणे) यांनी बोरगाव पोलिस ठाण्यात खबर दिली. सहायक फौजदार रामचंद्र फरांदे तपास करत आहेत.