पुसेगाव (जि. सातारा) ः कोरोना महामारीमुळे सारे जग विविध संकटांचा सामना करत आहे. अशा वेळी शाळेतील विद्यार्थ्यांच्या आरोग्याबरोबरच शाळेच्या परिसराचेही रक्षण व्हावे, यासाठी श्री हनुमानगिरी हायस्कूल व ज्युनिअर कॉलेजमधील सन 1994 च्या दहावी बॅचमधील माजी विद्यार्थ्यांनी या शाळेला आरोग्य सुरक्षा उपकरणांची अनोखी भेट दिली आहे. 

यानिमित्त झालेल्या कार्यक्रमात सेवागिरी शिक्षण मंडळाचे सचिव डॉ. सुरेश जाधव म्हणाले, ""कोरोना साथीच्या कालावधीत सध्या शैक्षणिक क्षेत्रात ग्रामीण भागातील विद्यार्थ्यांना ऑनलाइन, ऑफलाइन शिक्षण देण्यासाठी प्रयत्न सुरू आहेत. विद्यार्थ्यांचे शैक्षणिक नुकसान टाळण्यासाठी, तसेच विद्यार्थ्यांची गुणवत्ता वाढवण्यासाठी श्री सेवागिरी शिक्षण प्रसारक मंडळ नावीण्यपूर्ण उपक्रम राबवत आहे. दहावीच्या माजी विद्यार्थ्यांनी वस्तुरूपाने केलेली मदत शाळेने केलेल्या संस्काराची देणे आहे.'' 

अध्यक्षस्थानी संस्थेचे अध्यक्ष विश्वनाथराव जाधव होते. या वेळी अविनाश माधव जाधव यांनी दोन थर्मल मीटर भेट दिले. जगदीश जाधव, सुनील क्षीरसागर, अजित गायकवाड, सचिन नवगण, प्रवीण पवार, सुचिता पवार, रूपाली देशमुख, जयश्री तोडकर, वैशाली नाळे, मृणाली पांढरे-गुरव, गणेश शेडगे, उमेश जाधव, महेश पवार, प्रवीण जाधव या माजी विद्यार्थ्यांनी औषध फवारणी पंप, सॅनिटायझर, फिनेल, ऍसिड, हॅंडवॉश, मास्क, साबण, नॅपकीन आदी वस्तू सुपूर्त केल्या. 

कार्यकमास श्री सेवागिरी देवस्थानचे अध्यक्ष मोहनराव जाधव पाटील, सेवागिरी ट्रस्टचे विश्वस्त योगेशराव देशमुख, सदस्य जयंतराव जाधव, एस. आर. पाटील, प्राचार्य दिलीप काळे, पर्यवेक्षक सुधाकर माने उपस्थित होते. मोहनराव गुरव यांनी सूत्रसंचालन केले. संजय जाधव यांनी आभार मानले. 

जिल्ह्यात 43 कोरोनाबाधित वाढले; सातारा शहरात चिंता वाढली