कऱ्हाड (जि. सातारा) : ओडिशा येथे झालेल्या हर्क्‍युलीन ट्रायथलॉन स्पर्धेत येथील वेदांत अभय नांगरे याने सलग दुसऱ्या वर्षी "हर्क्‍युलीन ट्रायथलॉन' मेडल पटकावले. त्याने साडेतीन किलोमीटर पोहणे, 180 किलोमीटर सायकलिंग आणि 42 किलोमीटर धावणे हे सलगपणे केवळ 15 तास 41 मिनिटांत पूर्ण केले.

ओडिशा येथे झालेल्या स्पर्धेसाठी भारतातून 150 स्पर्धकानी स्प्रिंट, हाफ व फुल डिस्टन्स रेसमध्ये भाग घेतला. फुल डिस्टन्स रेसकरिता 20 स्पर्धकांनी सहभाग नोंदवला. स्पर्धेत साडेतीन किलोमीटर पोहणे, 180 किलोमीटर सायकलिंग आणि 42 किलोमीटर धावणे करायचे होते. ही स्पर्धा 17 तासांपूर्वी पूर्ण करणे आवश्‍यक असते. वेदांतने सलगपणे केवळ 15 तास 41 मिनिटांत ते पूर्ण केले. स्पर्धेच्या तयारीदरम्यान कोरोनामुळे झालेल्या लॉकडाउनने पोहण्याची तयारी करणे कठीण होते.

मात्र, स्विमिंग टॅंक सुरू होईपर्यंत वेदांतने परिसरातील वेगवेगळ्या तलावांमध्ये पोहण्याची तयारी केली. याचबरोबर परिसरातील रस्ते तसेच डोंगर-दऱ्यांमधून सायकलिंग तसेच धावण्याचा सराव केला. या खडतर स्पर्धा भारताबाहेर होतात. स्पर्धेतील स्पर्धकांना "आयर्न मॅन' म्हणून संबोधले जाते. वेदांतला त्याचे आई-वडील यांच्याबरोबरच खासदार श्रीनिवास पाटील, त्यांच्या पत्नी रजनीदेवी पाटील, युवा नेते सारंग पाटील यांचे मार्गदर्शन मिळाले. वेदांतच्या यशाबद्दल खासदार पाटील, सारंग पाटील यांच्या हस्ते सत्कार करण्यात आला.

Edited By : Balkrishna Madhale