वाई : वाई गुन्हे प्रकटीकरण विभागाच्या कर्मचाऱ्यांनी एकाच दिवशी दुचाकी चोरीचे चार गुन्हे उघडकीस आणले. या प्रकरणी चौघांवर गुन्हा दाखल करण्यात आला असून सुमारे दोन लाख किमतींच्या चार दुचाकी ताब्यात घेण्यात आल्या आहेत. संशयितापैकी दोन जण अल्पवयीन असल्याची माहिती पोलीस निरीक्षक बाळासाहेब भरणे यांनी दिली.

वर्षभरात पोलीस ठाण्यात १५ दुचाकी चोरीचे गुन्हे दाखल आहेत. त्याअनुषंगाने गस्त वाढवून शोध घेण्याच्या सूचना गुन्हे प्रकटीकरण विभागाला दिल्या होत्या. जिल्हा पोलीस अधीक्षक यांनीही दुचाकी चोरीच्या वाढत्या गुन्ह्यांना आळा घालण्यासाठी संपूर्ण जिल्ह्यात नाकाबंदी नेमण्याबाबत सूचना केल्या होत्या. त्यानुसार गुन्हे प्रकटीकरण विभागाचे कर्मचारी शोध घेताना एक मुलगा दुचाकीवरून फिरताना दिसला. त्यास ताब्यात घेऊन चौकशी केली असता त्याने ही दुचाकी रविवार पेठेतील अपार्टमेंटमधून चोरल्याचे सांगितले. त्याशिवाय आणखी एक दुचाकी चोरल्याचे कबूल केले. या दोन्ही गाड्या ताब्यात घेण्यात आल्या आहेत. त्याचवेळी जैन मंदिरापासून चोरीस गेलेली दुचाकी ही धर्मपुरी पेठेतील एकाने चोरल्याचे समजले. शोध घेऊन त्याच्याकडून ही दुचाकी ताब्यात घेतली.

पसरणीतील एकाकडे चोरीची दुचाकी असल्याची माहिती मिळाली. चिखलीतील एकाने ही गाडी दिल्याचे सांगितले. या चोरट्यासही ताब्यात घेण्यात आले. याबाबत वाई पोलीस ठाण्यात तीन, तर सातारा पोलीस ठाण्यात एका गुन्हयाची नोंद आहे. या प्रकरणी शाहरुख शरीफ बागवान (वय २८, रा. पागतलीमजवळ, धर्मपुरी, वाई) व विकास आनंदा दळवी (वय ३१, रा. चिखली, ता. वाई) या दोन संशयिताना अटक केली असून त्यांना न्यायालयीन कोठडी मिळाली आहे. अन्य दोन अल्पवयीन मुलांना बालसुधार गृहात पाठविण्यात येणार आहे.

पोलिस उपअधिक्षक डॉ. शीतल जान्हवे- खराडे, पोलीस निरिक्षक बाळासाहेब भरणे यांच्या मार्गदर्शनाखाली सहायक पोलिस उपनिरीक्षक विजय शिर्के, महिला पोलीस नाईक सोनाली माने, हवालदार अमित गोळे, किरण निंबाळकर, प्रसाद दुदुस्कर, श्रावण राठोड यांनी ही कारवाई केली.