सातारा : उद्‌घाटनास मनाई असताना राजवाडा बस स्थानकावरील भित्तिशिल्पावरील ताडपत्री काढून नुकसान करून शांतता भंग केल्याप्रकरणी मिलिंद एकबोटे व नगरसेवक विजय काटवटे यांच्यासह सुमारे ३० जणांवर शाहूपुरी पोलिस ठाण्यात गुन्हा दाखल (Case File) झाला आहे. राजवाडा बस स्थानकाच्या आवारात छत्रपती शिवाजी महाराज (Chhatrapati Shivaji maharaj) व समर्थ रामदास स्वामी यांच्या भेटीचे भित्तिशिल्प उभारण्यात आले आहे. त्यावर काहींनी आक्षेप घेतला आहे. असे असतानाही काल (ता. २०) सायंकाळी नगरसेवक विजय काटवटे, प्रतापगड उत्सव समितीचे मिलिंद एकबोटे यांच्यासह कार्यकर्त्यांनी या भित्तिशिल्पाचे उद्‌घाटन करण्याचा प्रयत्न केला.

याप्रकरणी एसटी महामंडळाच्या आगार व्यवस्थापक रेश्मा गाडेकर यांनी फिर्याद दिली आहे. त्यानुसार प्रतापगड उत्सव समितीचे मिलिंद रमाकांत एकबोटे (रा. शिवाजीनगर, पुणे), भाजप नगरसेवक विजय अजित काटवटे (रा. रामाचा गोट, सातारा), शहाजीबुवा रामदासी (रा. सज्जनगड, ता. सातारा), संकेत विजयकुमार शिंदे (रा. पिलेश्वरीनगर करंजे, सातारा), सूरज सोमनाथ भगत (रा. वडकी, ता. हवेली, जि. पुणे) यांच्यासह अनोळखी २५ ते ३० जणांवर गुन्हा दाखल करण्यात आला आहे. सहायक फौजदार जगदाळे हे तपास करीत आहेत.