मायणी : येथे जोरदार वादळी वाऱ्यासह काल रविवारी (ता.पाच ) झालेल्या पावसामुळे बायाक्का सर्जेराव देशमुख यांच्या मालकीची द्राक्ष बाग जमीनदोस्त होऊन सुमारे पाच लाख रुपयांचे नुकसान झाल्याचा प्राथमिक अंदाज आहे. वादळी वारे व पावसाने घरांचे पुढचं होऊन पडझड होऊन सुमारे एक लाखाचे नुकसान झाल्याचा प्राथमिक अंदाज आहे. एका केळीच्या बागेतील ८७ झाडेही जमीनदोस्त झाली आहेत. तर चार ठिकाणी पत्र्याची शेड वादळी वाऱ्याने उडून जाऊन लाखाच्या घरात नुकसान झाले आहे.

आज येथील गाव कामगार तलाठी गौरव खटावकर व पोलीस पाटील प्रशांत कोळी यांनी घटनास्थळी भेट देत नुकसानीचे पंचनामे केले. त्यानुसार, शिंदेवाडा रोड लगत मायणी तलाव परिसरातील बायाक्का सर्जेराव देशमुख यांच्या मालकीची गट नं. २२८ मधील ०.६० हेक्टर आर क्षेत्रावरील द्राक्ष बाग जमीनदोस्त झाली आहे सुमारे अकराशे झाडे जमिनीवर कोसळली आहेत. त्या मांडवाची पुन:उभारणी करण्यासाठी किमान पाच लाख रुपये खर्च येणार असल्याचे देशमुख यांनी सकाळला सांगितले. दरम्यान, येथील इंदिरानगर भागातील संगिता नामदेव तुपे यांच्या राहत्या घरावरील पत्र्याचे छत उडून गेले आहे. त्याच भागातील दत्ता शंकर मोरे यांच्या मालकीच्या शेडचे पत्रे उडाले आहेत.

महावितरण कार्यालयाच्या पाठीमागे येईल श्रीखंडे वस्ती परिसरातील दत्तात्रय सोपान कचरे यांनी जनावरासाठी उभे केलेल्या शेडचे पत्रे उडून गेलेत. संग्राम माने यांचे गट नं.२११० मधील जनावरांसाठी उभे केलेल्या शेडचे पत्रे उडून गेले आहेत. तर त्याच भागात राहणाऱ्या हसन चाँद बागवान यांचे मालकीचे गट नं. २१०६ मधील केळीची ८७ झाडे जमीनदोस्त झाली. आहेत. दरम्यान, घरावरील पत्रे व जनावरांच्या शेड वरील पत्रे उडून गेल्याने नुकसानग्रस्त कुटुंबीय अडचणीत आले आहे. त्यांना तातडीने सरकारी मदतीची मागणी होत आहे. दरम्यान वादळी वाऱ्यामुळे काल सायंकाळी पाचच्या दरम्यान खंडित झालेला वीजपुरवठा रात्रभर आणि आज दिवसभरही सुरळीत होऊ शकला नाही. त्यामुळे लोकांचे दैनंदिन व्यवहार ठप्प झाले. अनेक अडचणींचा सामना करावा लागला.