सातारा : युवकांना कॉंग्रेसच्या माध्यमातून ताकद देऊन आगामी निवडणुकांत जास्तीतजास्त युवकांना स्थानिक स्वराज्य संस्थांमध्ये सक्रिय करण्याचा संकल्प युवक कॉंग्रेसच्या वतीने सोडण्यात आला आहे. त्यानुसार जिल्ह्यात आगामी काळात होणाऱ्या ग्रामपंचायतींसह इतर सर्व निवडणुकांत जास्तीतजास्त युवकांना संधी दिली जाणार आहे. युवकचे प्रदेशाध्यक्ष सत्यजित तांबे यांनी एक हजार युवकांना स्थानिक स्वराज्य संस्थांमध्ये नेतृत्व करण्याची संधी देण्याचा संकल्प केलेला आहे. त्याची प्रतिपूर्ती सातारा जिल्ह्यात युवकचे जिल्हाध्यक्ष विराज शिंदे करणार आहेत. त्यासाठी त्यांनी आतापासूनच प्रयत्न सुरू केले आहेत.
जिल्ह्यातील कॉंग्रेसमधील गटतट आता दूर होत आहेत. याची सुरवात माजी मुख्यमंत्री पृथ्वीराज चव्हाण व ज्येष्ठ नेते विलासराव पाटील- उंडाळकर यांच्या गटाच्या मनोमिलनाने झालेली आहे. आता पक्षाच्या सर्व विभागांत असलेली पदाधिकारी व कार्यकर्त्यांची नाराजी दूर करून त्यांना एकसंध करण्याचे काम कॉंग्रेस पक्षाने हाती घेतलेले आहे. त्याचाच एक भाग म्हणून युवक कॉंग्रेसचे प्रदेशाध्यक्ष सत्यजित तांबे यांनी आगामी स्थानिक स्वराज्य संस्थांच्या निवडणुकीत एक हजार युवकांना संधी देऊन त्यांना निवडून आणण्याचा संकल्प केला आहे. त्याची अंमलबजावणी आता प्रत्येक जिल्ह्यात सुरू करण्यात आली आहे. सातारा जिल्ह्यात युवक कॉंग्रेसचे अध्यक्ष विराज शिंदे यांनी त्यासाठी पुढाकार घेतला आहे. त्यांनी जिल्हा परिषद निवडणुकीसाठी "सुपर 30 चा' फॉर्म्युला तयार केला आहे. यामध्ये जिल्हा परिषदेच्या किमान 30 गटांत युवकांना संधी देऊन त्यांना पक्षीय बॅकअप आणि ताकद दिली जाणार आहे.
उंडाळकर-चव्हाणांच्या मनोमिलनानंतर कऱ्हाडात 'आनंद'; माजी आमदार पुन्हा सक्रिय!
त्यासाठी त्या-त्या गट व गणनिहाय समस्यांचे निराकरण करणे, विकासकामे मार्गी लावणे, नागरिकांच्या शासकीय पातळीवरील समस्या सोडविण्यास प्राधान्य दिले जाणार आहे. त्यानुसार प्रत्येक ठिकाणी युवक कॉंग्रेसमधील सक्षम आणि सक्रिय कार्यकर्त्यांना तयार केले जाणार आहे. पुढील वर्षात होणाऱ्या ग्रामपंचायतींच्या निवडणुकीत युवक कॉंग्रेस त्यांच्या स्थानिक पातळीवरील युवकांच्या फळीचा वापर करणार आहे. त्यातूनच जास्तीतजास्त सक्षम युवकांना ग्रामपंचायत पातळीवर निवडून आणण्याचा प्रयत्न राहणार आहे. युवक कॉंग्रेसच्या माध्यमातून कार्यकर्त्यांना सक्षम केले जाणार आहे. स्थानिक स्वराज्य संस्थांच्या, तसेच सहकारी संस्थांच्या निवडणुकीतही हाच पायंडा पुढे चालविला जाणार आहे.
प्रत्येक युवक सक्षम करण्यावर भर
युवकचे प्रदेशाध्यक्ष सत्यजित तांबे यांची स्थानिक स्वराज्य संस्थांमध्ये एक हजार युवकांना प्रतिनिधत्व देण्याची संकल्पना सातारा जिल्ह्यातही प्रभावीपणे जिल्हाध्यक्ष विराज शिंदे राबविणार आहेत. त्यातून युवक कॉंग्रेसच्या माध्यमातून युवकांना मुख्य प्रवाहात आणण्याचे काम होणार आहे. प्रत्येक युवक सक्षम करण्यावर युवक कॉंग्रेस भर देणार आहे. त्यासाठीची बांधणी आतापासूनच सुरू झाली आहे.
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.