सातारा : स्मार्ट प्राथमिक आरोग्य केंद्र, स्मार्ट शाळांच्या धर्तीवर जिल्हा परिषद स्मार्ट अंगणवाडी अंतर्गत ‘अंकुर बालशिक्षण’ हा नावीन्यपूर्ण उपक्रम राबविण्यात येणार आहे. अंकुर बालवाडीचे शिक्षण तीन ते सहा वयोगटासाठी दिले जाणार असून, या उपक्रमांतर्गत बालकांच्या शिक्षणाचे मूल्यांकन करण्यात येणार आहे. मराठी व इंग्रजी भाषेचा समन्वय साधून बालकांसाठी अभ्यासक्रम बनविला आहे.

जून महिन्याच्या शेवटच्या आठवड्यापासून ‘अंकुर बालशिक्षण’ हा नावीन्यपूर्ण उपक्रम सुरू होणार असून, त्यासाठी पर्यवेक्षिका व प्रत्येक केंद्रातील दोन सेविकांना प्रशिक्षणही देण्यात आले आहे. जिल्हा परिषदअंतर्गत ग्रामीण भागात एकूण चार हजार ५६० अंगणवाडी केंद्र असून, पूर्व प्राथमिक शिक्षण घेणाऱ्या तीन ते सहा वयोगटातील बालकांसाठी संख्या सुमारे पाऊण लाख आहे. या बालकांसाठी स्मार्ट अंगणवाडी उपक्रमांतर्गत अंकुर बालवाडी उपक्रम राबवण्यात येणार आहे.

सद्य:स्थितीमध्ये राज्य शासनामार्फत अंगणवाडीतील बालकांसाठी हा अभ्यासक्रम पूर्व प्राथमिक शिक्षणासाठी वेगवेगळे उपक्रम राबवून घेण्यात येत होता; परंतु बालकांच्या वयोगटानुसार अभ्यासक्रम लेखन सामग्रीचा अभाव होता. यासाठी अंकुर बालशिक्षणासाठी तीन ते सहा वर्षांपर्यंतच्या वयोगटासाठी अभ्यासक्रम तयार केला आहे. या उपक्रमासाठी २०२३ व २४ च्या जिल्हा परिषद सेस निधीमधून एक कोटी १८ लाख रुपयांची तरतूद केली आहे.जिल्ह्यातील अंगणवाड्यांमध्ये आता ‘अंकुर बालशिक्षण’