Car Tips : सध्या पावसाने कहर केलाय. अनेक भाग पुराच्या विळख्यात आलेत. अनेक भागात पाणी तुंबले आहे. अशा परिस्थितीत तुमच्या गाडीतून बाहेर पडणं तुमच्यासाठी मोठं संकट ठरू शकतं. शिवाय लाखोंच नुकसान होतं ते वेगळंच. पण आज आम्ही तुम्हाला सांगणार आहोत की जर तुमची कार सायलेन्सरपर्यंत पाण्यात बुडली तर तुम्ही काय करायला पाहिजे. काही ट्रिक्सच्या मदतीने तुम्ही तुमचे लाखो रुपये वाचवू शकता.

सायलेन्सरमध्ये पाणी शिरल्याने होतं मोठं नुकसान

गाडी पाण्यात बुडली तर त्याच्या इंजिनमध्ये पाणी शिरण्याची भीती असते आणि चुकून त्यात पाणी शिरले तर लाखोंचे नुकसान होऊ शकते. यामुळे कारच्या इलेक्ट्रिकल पार्टसचे नुकसान होते. अशा स्थितीत काही गोष्टींची काळजी घ्यायला हवी.

कार सुरू करू नका

जर तुमची गाडी सायलेन्सरपर्यंत पाण्यात गेली असेल, तर अशा स्थितीत गाडी सुरू करण्याचा प्रयत्न करू नका. अशा स्थितीत इंजिनमध्ये पाणी जाण्याचा धोका जास्त असतो कारण कार सुरू केल्यास इंजिन पूर्णपणे खराब होऊ शकते. इंजिन तपासण्यासाठी, डिपस्टिक काढा आणि इंजिनमध्ये पाणी पोहोचले आहे की नाही ते पाहा. डिपस्टिकमध्ये पाण्याचे एक-दोन थेंब जरी दिसले तर समजा की इंजिनमध्ये पाणी शिरले आहे.

या ट्रिक्स वापरा

तुमच्या कारची बॅटरी डिस्कनेक्ट करा, यामुळे कारच्या इलेक्ट्रिकल पार्टस आणि तारांमध्ये पाणी जाण्यापासून प्रतिबंध होईल. असं केलं नाही तर गाडीच्या वायरमध्ये पाणी शिरते आणि शॉर्ट सर्किट होण्याचा धोका असतो.

कारमधून पाणी काढून टाकण्यासाठी, तुम्हाला तुमची कार कोरड्या आणि सूर्यप्रकाशाच्या ठिकाणी ठेवणं आवश्यक आहे. यानंतर, कारचे दरवाजे उघडा आणि काही तास उन्हात वाळवा, यामुळे कारमधील सर्व पाणी कोरडे होईल.

कारचे इंजिन ऑईल आणि कूलंट बदला कारण जेव्हा पाणी इंजिनमध्ये जाते तेव्हा ते इंजिन ऑईल आणि कूलंटमध्ये मिसळते. यामुळे इंजिन ऑइल आणि कूलंट दोन्ही खराब होतात. अशा परिस्थितीत, कार सुरू करण्यापूर्वी आपण इंजिन ऑईल आणि कूलंट बदलणे आवश्यक आहे.