ISRO Moon Mission : भारताची महत्त्वाकांक्षी चांद्रमोहीम आता अंतिम टप्प्यात आली आहे. चांद्रयानाच्या चंद्राच्या कक्षेतील सर्व प्रक्रिया पूर्ण झाल्या असून, आता केवळ लँडिंगची प्रतीक्षा आहे. यातच इस्रोने एक्स पोस्ट करत 'चांद्रयान-3'च्या लँडिंगची तारीख अन् वेळ सांगितली आहे.

कधी होणार लँडिंग

इस्रोने दिलेल्या माहितीनुसार, 23 ऑगस्ट 2023 रोजी चांद्रयान-3 हे चंद्रावर सॉफ्ट लँडिंग करणार आहे. बुधवारी सायंकाळी 6 वाजून 4 मिनिटांनी हे लँडिंग होईल. सध्या चांद्रयान-3 सुस्थितीत असून, लँडिंगसाठी विक्रम सज्ज असल्याचंही इस्रोने स्पष्ट केलं आहे.

कुठे पाहता येणार लाईव्ह?

चांद्रयान-3 च्या लँडिंगचं थेट प्रक्षेपण पाहण्यासाठी तुम्ही इस्रोच्या अधिकृत वेबसाईटला भेट देऊ शकता. यासोबतच, DD नॅशनल टीव्हीवर देखील याचं लाईव्ह स्ट्रीमिंग होणार आहे. सोबतच, इस्रोच्या यूट्यूब आणि फेसबुक पेजवर देखील हा ऐतिहासिक क्षण लाईव्ह पाहता येणार आहे.

बुधवारी सायंकाळी 5 वाजून 27 मिनिटांनी थेट प्रक्षेपणास सुरुवात होईल, असं इस्रोने आपल्या पोस्टमध्ये म्हटलं आहे. ही मोहीम यशस्वी झाल्यास चंद्रावर उतरणारा भारत चौथा देश ठरणार आहे. तसंच, चंद्राच्या दक्षिण ध्रुवावर यशस्वी लँडिंग करणारा भारत हा पहिलाच देश ठरेल.

रशियाची मोहीम अयशस्वी

दरम्यान, चांद्रयान-3 पूर्वीच रशियाचं लूना-25 हे चंद्राच्या दक्षिण भागात लँड होणार होतं. मात्र, काही तांत्रिक अडचणींमुळे लूना 25 चं लँडर चंद्रावर क्रॅश झालं. यामुळे रशियाचं स्वप्न भंगलं आहे. केवळ रशियासाठीच नाही, तर संपूर्ण जगासाठी ही एक दुर्दैवी घटना आहे.