चॅटजीपीटी हा एआय चॅटबॉट अखेर अँड्रॉईडवर उपलब्ध झाला आहे. गुगल प्ले स्टोअरमधून तुम्ही चॅटजीपीटीचं अधिकृत अ‍ॅप डाऊनलोड करू शकता. यापूर्वी चॅटजीपीटी हे केवळ पीसी आणि अ‍ॅपलवर उपलब्ध होतं.

काय आहे चॅटजीपीटी?

ओपन एआय कंपनीने तयार केलेला हा एक एआय चॅटबॉट आहे. हा चॅटबॉट यूजर्सना विचारलेल्या कोणत्याही प्रश्नांची उत्तरं देतो. कित्येक विद्यार्थी आपला होमवर्क करण्यासाठी, तर कित्येक लोक आपलं ऑफिसचं काम करण्यासाठी याचा वापर करतात. अर्थात, चॅटजीपीटीवर उपलब्ध असलेली माहिती ही केवळ सप्टेंबर २०२१ पर्यंतची आहे. (ChatGPT App)

यापूर्वी हा चॅटबॉट केवळ कम्प्युटर किंवा आयफोनवर वापरता येत होता. आता अँड्रॉईड मोबाईलसाठी देखील याचं अ‍ॅप उपलब्ध झालं आहे. मात्र, गुगलच्या प्ले-स्टोअरवर जर तुम्ही 'चॅटजीपीटी' सर्च केलं, तर कित्येक एआय अ‍ॅप्स तुम्हाला दिसतील. यातील केवळ एकच अ‍ॅप हे अधिकृत आहे. (ChatGPT on Android)

असं ओळखा अधिकृत अ‍ॅप

अधिकृत चॅटजीपीटी अ‍ॅपचा लोगो हा पांढऱ्या रंगाचा आहे. यावर काळ्या रंगाचा चॅटजीपीटीचा लोगो दिला आहे. या अ‍ॅपवर क्लिक करुन तुम्ही याची डेव्हलपर कंपनी कोणती आहे हे पाहू शकता. ओरिजिनल चॅटजीपीटी अ‍ॅप हे 'ओपन एआय' या कंपनीने तयार केलं आहे. याठिकाणी असलेल्या इन्स्टॉल या बटणावर क्लिक करून तुम्ही हे अ‍ॅप डाऊनलोड करू शकता. (How to download ChatGPT)

ओपन एआय या डेव्हलपरने बनवलेलं अ‍ॅपच अधिकृत चॅटजीपीटी आहे. याव्यतिरिक्त इतर डेव्हलपर्सने तयार केलेले अ‍ॅप कदाचित तुमच्या फोनमधील डेटा देखील चोरू शकतात. त्यामुळे, अशा अ‍ॅप्सपासून सावधगिरी बाळगणं गरजेचं आहे.