Delhi Woman Swiggy Account Hacked : सध्या सायबर गुन्हेगारीचे प्रकार दिवसेंदिवस वाढत चालले आहेत. सायबर गुन्हेगार हे केवळ फोनमधील बँकिंग अ‍ॅप्सना टार्गेट करतात असं जर तुम्हाला वाटत असेल, तर थोडं थांबा! दिल्लीमध्ये एका महिलेचं फूड डिलिव्हरी अ‍ॅप हॅक करुन, त्यावरुन तब्बल एक लाख रुपयांची ऑर्डर केल्याची घटना समोर आली आहे.

याप्रकरणी दिल्ली पोलिसांनी दोन तरुणांना अटक केली आहे. 25 आणि 23 वर्षे वय असणाऱ्या या तरुणांनी हा प्रताप केला आहे. यातील एक तरुण आधी स्विग्गी आणि झोमॅटोमध्ये डिलिव्हरी बॉय म्हणून काम करत होता. इंडियन एक्स्प्रेसने याबाबतचं वृत्त प्रसिद्ध केलं आहे. (Swiggy Account hacked)

कसं केलं अकाउंट हॅक?

पोलिसांनी दिलेल्या माहितीनुसार, हे आरोपी 'इंटरॅक्टिव्ह व्हॉईस रिस्पॉन्स सिस्टीम'चा वापर करुन लोकांचे स्विग्गी अकाउंट हॅक करत होते. यानंतर हॅक केलेल्या अकाउंटचा वापर करुन ते स्विग्गी इन्स्टामार्टवरुन किराणा सामान ऑर्डर करायचे. हे सामान ते पुढे कमी किंमतीला विकून टाकत होते.

महिलेच्या अकाउंटवरुन लाखांची ऑर्डर

सुल्तानपूरमधील एका महिलेचं अकाउंटही या दोघांनी हॅक केलं होतं. या महिलेने याबाबत पोलिसांमध्ये तक्रार दाखल केली होती. या महिलेला रात्री उशीरा एक 'ऑटोमेटेड टेलिफोनी इंटरॅक्टिव्ह व्हॉईस रिस्पॉन्स सिस्टीम'वरुन (IVR) कॉल आला होता. त्या महिलेला रेकॉर्डेड आवाजात हे सांगण्यात आलं होतं, की तिचं अकाउंट हॅक करण्याचा प्रयत्न केला जात आहे.

यानंतर या महिलेचं अकाउंट हॅक झालं, आणि त्यातून तब्बल 97,197 रुपयांची ऑर्डर करण्यात आली. यामध्ये देखील किराणा सामान मागवण्यात आलं होतं. डिलिव्हरीसाठी देण्यात आलेला नंबर खोटा होता. मात्र पत्ता गुडगावचा होता. पोलिसांनी या माहितीच्या आधारे तपास करून दोघा आरोपींना ताब्यात घेतलं.