गुंतवणूकीच्या माध्यमातून चांगला परतावा देण्याच्या आमिषाने फसवणूक करणाऱ्या तीन अँड्रॉईड अ‍ॅप्सवर ईडीने कारवाई केली आहे. या तीन अ‍ॅप्सच्या माध्यमातून तब्बल 150 कोटी रुपयांची फसवणूक करण्यात आली आहे. हजारो लोकांना याचा फटका बसला आहे.

याप्रकरणी अंमलबजावणी संचलनालयाने (ED) वैभव दीपक शाह, सागर डायमंड्स, आरएचसी ग्लोबल एक्स्पोर्ट्स आणि काही अन्य जणांवर गुन्हा दाखल केला. कथित पॉवर बँक फसवणूक प्रकरणात एकूण 59.44 कोटी रुपयांची संपत्ती जप्त करण्यात आली आहे.

एबीपीने दिलेल्या वृत्तानुसार; उत्तराखंड पोलीस, कर्नाटक पोलीस, दिल्ली पोलीस स्पेशल सेल याठिकाणी दाखल असलेल्या तक्रारींवरुन ईडीने ही कारवाई केली आहे. यामध्ये चिनी कंपन्याचा देखील सहभाग असल्याचं ईडीने स्पष्ट केलं आहे. (Scam News)

कोणते आहेत अ‍ॅप्स?

गुगल प्ले स्टोअरवर असणाऱ्या पॉवर बँक अ‍ॅप, टेस्ला पॉवर बँक अ‍ॅप आणि ईजप्लॅन अ‍ॅप या अ‍ॅप्सवर ही कारवाई करण्यात आली आहे. काही चिनी ठगांनी भारतातील कंपन्यांचे सीए आणि सचिव यांच्यासोबत संगनमत करुन या फेक कंपन्या उभारल्या असल्याचं ईडीने म्हटलं आहे.

कशी करायचे फसवणूक?

हे अ‍ॅप्स लोकांना पैशांच्या गुंतवणूकीवर हाय रिटर्न देण्याचे आमिष दाखवायचे. एखाद्या व्यक्तीने पैसे गुंतवले असता, त्याचं अकाउंट थेट ब्लॉक केलं जायचं आणि सर्व पैसे हडपण्यात येत होते. अशा प्रकारे तब्बल 150 कोटी रुपये लुबाडण्यात आले होते. तसंच खोटी आयात दाखवून हे पैसे विदेशात देखील पाठवण्यात आले होते.

दिल्ली पोलिसांनी 2021 साली जून महिन्यात सर्वात पहिल्यांदा याप्रकरणी कारवाई केली होती. सध्या याबाबत तीन लोकांविरोधात दिल्लीतील पीएमएलए विशेष न्यायालयात खटला सुरू आहे.

काय घ्यावी खबरदारी?

पैशांची गुंतवणूक करण्यापूर्वी नेहमी तज्ज्ञांचा सल्ला घ्यावा. तसंच खासगी अ‍ॅप्सचा वापर करण्याऐवजी बँकांच्या अधिकृत अ‍ॅप्सना प्राधान्य द्यावं. पैशांच्या गुंतवणुकीबाबत एखादं अ‍ॅप डाऊनलोड करण्यापूर्वी त्याची रेटिंग आणि रिव्ह्यू नक्की तपासावेत.