Twitter X Recruitment : 'एक्स' (ट्विटर) या सोशल मीडिया प्लॅटफॉर्मवर आता मोठ्या प्रमाणात भरती होणार आहे. इलॉन मस्कने विकत घेतल्यानंतर ट्विटरमधून सात हजारांपेक्षा जास्त कर्मचाऱ्यांना काढून टाकण्यात आलं होतं. यानंतर आता कंपनीत पुन्हा भरती होणार असल्याचे संकेत सीईओ लिंडा याक्कारिनो यांनी दिले आहेत.

सीएनबीसी या वृत्तवाहिनीला दिलेल्या एका मुलाखतीमध्ये कंपनीच्या सीईओंनी हे संकेत दिले. "कंपनी पूर्वी कॉस्ट डिसिप्लिन या टप्प्यात होती. मात्र, आता कंपनीची ग्रोथ होत आहे. कंपनीची वाढ म्हणजे नवीन भरती", असं त्या म्हणाल्या.

कंपनी करतेय प्रगती

मोठ्या प्रमाणात लेऑफ केल्यानंतरही 'एक्स' कंपनी चांगल्या प्रकारे काम करत आहे. मस्कने विकत घेतल्यानंतर कित्येक जाहिरातदारांनी ट्विटर सोडलं होतं. मात्र, आता हे जाहिरातदार देखील परत येत असल्याचं लिंडा यांनी सांगितलं. (Twitter layoffs)

लेऑफ होतं गरजेचं

यावेळी बोलताना लिंडा यांनी कंपनीने केलेल्या कामगार कपातीचं समर्थन केलं. हा निर्णय अवघड मात्र गरजेचा होता. कंपनीची आर्थिक परिस्थिती स्थिर करण्यासाठी हे गरजेचं होतं, असं त्या म्हणाल्या.

सध्या कंपनीच्या लिंक्डइन किंवा इतर सोशल मीडिया हँडलवर भरतीबाबत कोणतीही माहिती देण्यात आलेली नाही. एक्सच्या करिअर्स वेबसाईटवर देखील याबाबत पोस्ट करण्यात आलेली नाही. मात्र, लिंडा यांच्या वक्तव्यानंतर लवकरच कंपनीत मोठी भरती होईल, असं म्हटलं जात आहे.