Elon Musk Sacks X Employees : सोशल मीडिया प्लॅटफॉर्म 'एक्स'वर मोठ्या प्रमाणात हेट कंटेंट आणि स्पॅम होत असल्याचा आरोप नेहमीच होत असतो. हा हेट कंटेंट कमी करण्यासाठीच आपण 'ट्विटर' विकत घेतलं, असा दावा मागे इलॉन मस्क यांनी केला होता. मात्र, आता हेट कंटेंट कंट्रोल करण्यासाठी नेमलेल्या पथकातील तब्बल 1,213 कर्मचाऱ्यांना मस्कने घरचा रस्ता दाखवला आहे.

इलॉन मस्कने (Elon Musk) एक्स विकत घेतल्यानंतर काही महिन्यांमध्ये ही कर्मचारी कपात करण्यात आली आहे. ईसेफ्टी कमिशनने ही आकडेवारी जारी केली आहे. इलॉन मस्कने एक्सच्या हजारो कर्मचाऱ्यांना आतापर्यंत काढून टाकलं आहे. मात्र, ट्रोलिंग कंट्रोल टीममधील कर्मचाऱ्यांची कपात केल्यामुळे एक्सला मोठा फटका बसू शकतो.

ऑनलाईन ट्रोलिंग, हेट स्पीच (Hate Speech on X) यावर नियंत्रण ठेवणाऱ्या टीममधील कर्मचारी कमी झाल्यामुळे आता हा प्लॅटफॉर्म लोकांच्या वापरासाठी सुरक्षित राहिला आहे का? असा प्रश्न उपस्थित केला जातो आहे. या निर्णयामुळेच गेल्या काही महिन्यांमध्ये एक्सवरील ट्रोलिंग आणि हेट कंटेंट वाढला असल्याचं ऑस्ट्रेलियन वॉचडॉगने म्हटलं आहे.

ईसेफ्टी कमिशनने (ESafety Commission) यापूर्वी चाईल्ड पॉर्नोग्राफी कंटेंटमध्ये वाढ झाल्यामुळे एक्सला दंड ठोठावला आहे. कंपनीला यावेळी 3,88,000 डॉलर्स एवढा दंड भरावा लागला होता. कंपनीने अद्याप हा दंड भरला नसून, या आदेशाविरोधात न्यायालयात धाव घेतली आहे. या सगळ्यातच आता ट्रोलिंग कंट्रोल करणारे कर्मचारी कमी झाल्यामुळे एक्सवरील सुरक्षा रामभरोसेच असल्याचं म्हटलं जात आहे.

80 टक्के सॉफ्टवेअर इंजिनिअर बाहेर

ऑस्ट्रेलियन वॉचडॉगने दिलेल्या रिपोर्टनुसार, एक्सचे सुमारे 80 टक्के सॉफ्टवेअर इंजिनिअर बाहेर गेले आहेत. यातील कित्येकांना कंपनीने काढून टाकलं आहे, तर कित्येकांनी स्वतःच राजीनामा दिला आहे.