इलॉन मस्कने विकत घेतल्यापासून ट्विटर, म्हणजेच एक्स कंपनीत मोठ्या प्रमाणात बदल करण्यात आले आहेत. एक्सला एक 'एव्हरीथिंग अ‍ॅप' बनवण्याचा मस्कचा उद्देश्य आहे. त्यामुळे यामध्ये आता ऑडिओ-व्हिडिओ कॉलिंगचे फीचर देखील देण्यात येणार आहे.

हे फीचर कसे असतील, ऑडिओ कॉल आणि व्हिडिओ कॉल यांचे इंटरफेस कशे दिसतील याबाबत काही लीक्स समोर आले आहेत. Swak नावाच्या एक्स हँडलवरून हे लीक्स पोस्ट करण्यात आले आहेत. हे अर्ली प्रीव्ह्यू असून, यामध्ये भविष्यात बदल होण्याची शक्यता असल्याचं स्वाकने म्हटलं आहे.

या फीचर्सवर काम सुरू असल्याची माहिती यापूर्वीच इलॉन मस्कने दिली होती. मात्र, हे कधी लाँच होणार आहे याबाबत अद्याप कोणतीही माहिती समोर आलेली नाही. स्वाकने देखील 2024 पूर्वी हे फीचर एक्समध्ये मिळेल की नाही याबाबत कल्पना नसल्याचं म्हटलं आहे.

एव्हरिथिंग अ‍ॅप

एक्स अ‍ॅपमध्ये इतर अ‍ॅप्सच्या सगळ्याच गोष्टी आणण्याचा विडा इलॉन मस्कने उचलला आहे. यामध्ये लवकरच लिंक्ड इन प्रमाणे जॉब पोस्टिंग करता येणार आहे. तसंच ऑनलाईन शॉपिंगसाठी देखील पर्याय देण्यात येणार आहे. यापूर्वीच एक्सवर दोन तासांचे व्हिडिओ अपलोड करण्याची सुविधा देऊन मस्कने यूट्यूबचं टेन्शन वाढवलं होतं.