Union Bank Fake App : सध्या सगळे व्यवहार मोबाईलवरच होताना दिसत आहेत. जवळपास सर्वच बँकांनी आपल्या ग्राहकांच्या सोयीसाठी अ‍ॅप्स उपलब्ध करून दिले आहेत. मात्र याचाच गैरफायदा सायबर गुन्हेगार देखील घेताना दिसत आहेत. सरकारने सर्व अँड्रॉईड यूजर्सना युनियन बँकेच्या खोट्या अ‍ॅपबद्दल इशारा दिला आहे.

व्हॉट्सअ‍ॅपच्या माध्यमातून या अ‍ॅपची लिंक तसंच एपीके फाईल सगळीकडे व्हायरल होत आहे. Union-Rewards.apk नावाच्या या फाईलमध्ये बँकेचं खोटं अ‍ॅप दिलं आहे. सायबर दोस्त या सरकारच्या एक्स हँडलने याबाबत पोस्ट केली आहे.

युनियन बँकेच्या नावाने असलेलं हे अ‍ॅप बँकेचं नसून, सायबर गुन्हेगारांचं आहे. युनियन बँकेचं कार्ड वापरल्यानंतर त्यामध्ये असलेले पॉइंट्स रिडीम करण्यासाठी या अ‍ॅपचा वापर होईल असं सांगण्यात येत आहे. मात्र, हे अ‍ॅप तुमचे बँकिंग आणि कार्ड डीटेल्स चोरी करतं, आणि त्याचा गैरवापर होऊ शकतो असा इशारा सरकारने दिला आहे.

ट्रेडिंग अ‍ॅप्सचा सुळसुळाट

यासोबतच सायबर दोस्तने आयफोन यूजर्सना देखील फेक ट्रेडिंग अ‍ॅप्सबाबत इशारा दिला आहे. Group-S नावाचं एक शेअर मार्केट ट्रेडिंग अ‍ॅप सध्या अ‍ॅप स्टोअरवर उपलब्ध आहे. हे अ‍ॅप सेबी रजिस्टर्ड नसून, कित्येकांनी त्यामध्ये लाखो रुपये गमावले आहेत. Chu Chi Quoc Huy असं या अ‍ॅपच्या पब्लिशरचं नाव आहे.

याव्यतिरिक्त INSECG, CHS-SES, SAAI, SEQUOIA आणि GOOMI असे कित्येक ट्रेडिंग अ‍ॅप्स सध्या मार्केटमध्ये उपलब्ध आहेत ज्यांचं सेबीकडे रजिस्ट्रेशन झालेलं नाही. त्यामुळे असे अ‍ॅप्स न वापरण्याचा सल्ला सरकारने दिला आहे. यासोबतच सोशल मीडिया, व्हॉट्सअ‍ॅप ग्रुप किंवा टेलिग्राम चॅनलच्या माध्यमातून होणाऱ्या शेअर मार्केट ट्रेडिंगपासून दूर राहण्याचा इशाराही सेबीने दिला आहे.