Google Search Engine Down : संपूर्ण जगात सर्च इंजिन म्हणून लोकप्रिय असलेले गुगल मंगळवारी सकाळी काही काळासाठी बंद पडले. यामुळे युजर्समध्ये एकच खळबळ उडाली. आउटेज ट्रॅकिंग वेबसाइट Downdetector.com ने Google आउटेजची पुष्टी केली. जगभरातील Google सर्च इंजिन सुमारे 10 मिनिटांसाठी डाउन झाले होते. तथापि, या समस्येवर त्वरीत हालचाली करत ही सेवा काही काळातच पुन्हा सुरू केली. सेवा अचानक बंद झाल्यामुळे जागातील लाखो युजर्सला याचा फटका बसला. मात्र, ही सेवा अचानक कशी डाऊन झाली याचे कोणतेही ठोस कारण अद्याप समजू शकलेले नाही.

मंगळवारी सकाळी गुगल सर्चमध्ये 40,000 हून अधिक समस्यांची नोंद करण्यात आली ज्यावेळी युजर्स काही सर्च करण्याचा प्रयत्न करत होते. त्यावेळी Google पेजवर सर्व्हर 500 असा एअर दाखवत होता. तसेच पुन्हा 30 सेकदांनी युजर्सला प्रयत्न करा, होणाऱ्या समस्येबद्दल आम्ही दिलगीर असून, याबाबत संबंधित अभियंत्यांना सूचित करण्यात आले असून, समस्या सोडवण्यासाठी युद्धपातळीवर काम सुरू असल्याचा संदेश दिसून येत होता.

गुगल सर्चशिवाय Google Trends ही सेवा देखील काही काळासाठी बंद पडली होती. लिंक ओपन होत असली तरी, ट्रेंड दाखवणारी विंडो रिकामी होती. यामुळे ट्रेडिंग विषयांच्या सर्चसाठीदेखील युजर्सला त्रासाला सामोरे जावे लागले. रिअल-टाइम ट्रेंड मात्र व्यवस्थित काम करत होते. काही मिनिटांनी सेवा पूर्ववत झाली.