YouTube on Deepfake : गेल्या काही दिवसांपासून डीपफेकचा मुद्दा चर्चेत आहे. भारत सरकारने याबाबत ठोस नियमावली तयार करण्यासाठी सोशल मीडिया कंपन्यांना निर्देश दिले आहेत. यातच आता गुगलने देखील आपल्या यूट्यूब या प्लॅटफॉर्मच्या नियमांमध्ये बदल केले आहेत. आता यूट्यूब कंटेंट क्रिएटर्सना कोणतीही पोस्ट करण्यापूर्वी त्यातील एआयच्या वापराबाबत खुलासा करावा लागणार आहे.

अशी होणार कारवाई

कंटेंट क्रिएटर्सना आपल्या व्हिडिओमध्ये एआयचा कसा आणि किती वापर केला आहे, काय बदल केले आहेत याबाबत माहिती द्यावी लागणार आहे. ही माहिती न दिल्यास, गुगल स्वतःच कारवाई करत असे व्हिडिओ हटवणार आहे. येत्या काही महिन्यांमध्ये ही प्रक्रिया सुरू करण्यात येईल.

काय आहे डीपफेक?

डीपफेक व्हिडिओ म्हणजे असे व्हिडिओ ज्यामध्ये एखाद्या व्यक्तीचा चेहरा, आवाज, हावभाव बदलून नवीन व्हिडिओ तयार केले जातात. काही दिवसांपूर्वी रश्मिका मंदाना, कॅटरीना कैफ, काजोल आणि अगदी सारा तेंडुलकरला देखील डीपफेक व्हिडिओंमुळे भरपूर त्रास सहन करावा लागला होता. यानंतर पंतप्रधान मोदींनी देखील डीपफेक व्हिडिओंबाबत चिंता व्यक्त केली होती. (Tech News)

सरकारची कारवाई

केंद्र सरकार देखील डीपफेकच्या बाबतीत गांभीर्याने पावलं उचलत आहे. डीपफेक किंवा ऑनलाईन चुकीच्या कंटेंटबाबत तक्रार करण्यासाठी सरकार एक प्लॅटफॉर्म उपलब्ध करणार आहे. सोबतच अशा प्रकरणांकडे लक्ष ठेवण्यासाठी एक विशेष अधिकारी देखील नियुक्त करण्यात येणार आहे.