ग्रँड थेफ्ट ऑटो, म्हणजेच GTA गेम ही सर्वच गेमर्सच्या जिव्हाळ्याचा विषय आहे. भारतातील नाईन्टीज किड्सपैकी कित्येकांची पहिली कम्प्युटर गेम ही GTA Vice City होती. त्यानंतर जीटीएचे अनेक व्हर्जन्स समोर आले. GTA 5 या गेमने तर कित्येक रेकॉर्ड्स ब्रेक केले. आता GTA 6 गेम लाँच होण्यासाठी सज्ज झाली आहे.

लाँचपूर्वीच या गेममधील कित्येक व्हिडिओ क्लिप्स लीक झाल्या आहेत. यामधून या गेमचे फीचर्स पहायला मिळत असल्याचा दावा केला जात आहे. HT टेकने याबाबतचं वृत्त प्रसिद्ध केलं आहे. या गेममध्ये चक्क दोन मुख्य पात्रं असण्याची शक्यताही यातून वर्तवली जात आहे.

दोन मुख्य पात्रं

जीटीए गेममध्ये आतापर्यंत एकच मुख्य पात्र राहिलं आहे. मात्र आता पहिल्यांदाच GTA 6 मध्ये दोन मुख्य पात्रं असणार आहेत. जेसन आणि लुसिया अशी ही दोन पात्रं असणार आहेत. जीटीए सीरीजमध्ये मुख्य पात्र म्हणून एका फीमेल कॅरेक्टरला संधी देण्याची ही पहिलीच वेळ असणार आहे.

मॉल-इमारतींमध्ये जाता येणार

जीटीए गेम्समध्ये आतापर्यंत कित्येक मोठमोठ्या इमारती दाखवण्यात आल्या आहेत. मात्र, यातील ठराविक इमारतींमध्येच जाता येत होतं. जीटीए-6 मध्ये मात्र मॉल्स, सुपरमार्केट, बार, क्लब, पॉन शॉप, रेस्टॉरंट आणि अपार्टमेंट्समध्ये देखील आत जाता येणार आहेत.

हॅकिंग

वॉच डॉग्स गेममध्ये दाखवल्याप्रमाणे काही हॅकिंग फीचर्स देखील नव्या जीटीए गेममध्ये असण्याची शक्यता वर्तवण्यात येत आहे. एका लीकमध्ये असं दिसत आहे, की लुसिया ही आपल्यासोबत ट्रॅकर जॅमर, यूएसबी ड्राईव्ह आणि ऑटो डायलर असे डिव्हाईस घेऊन फिरत आहे. (Gaming News)

यासोबतच रेड डेड रिडम्प्शन 2 गेमप्रमाणे पोलीस रेकग्निशन सिस्टीम आणि इगल आय सिस्टीम देखील नव्या जीटीए गेममध्ये येण्याची शक्यता आहे. काही लीक्समध्ये हे फीचर्स दिसले आहेत.