Dwarka Darshan Scheme : श्रीकृष्णाचं जन्मस्थान असलेली द्वारका नगरी हजारो वर्षांपूर्वी समुद्राच्या तळाशी गेली होती. मात्र आता या द्वारका शहराचं दर्शन घेणं आपल्याला शक्य होणार आहे. गुजरात सरकार यासाठी विशेष पाणबुडी सफर सुरू करणार आहे.

एबीपीने दिलेल्या वृत्तानुसार, या पाणबुडीमध्ये एका वेळी 30 लोक प्रवास करू शकतील. सुमारे 35 टन वजनाच्या या पाणबुडीतून समुद्रामध्ये 300 फूट खोलीवर पर्यटकांना नेण्यात येईल. या पाणबुडीमध्ये दोन डायव्हर आणि एक मार्गदर्शक असणार आहेत.

हा एकूण प्रवास दोन ते अडीच तासांचा असणार आहे. समुद्राच्या खाली जायचं म्हणजे त्यासाठी तिकीट देखील तेवढंच महाग असणार आहे. मात्र, सर्वसामान्यांना देखील यातून प्रवास करता यावा यासाठी गुजरात सरकार सबसिडी देण्याचा विचार करत आहे.

कशी असणार पाणबुडी?

• या पाणबुडीचं वजन सुमारे 35 टन असेल.

• संपूर्ण एसी असणाऱ्या या पाणबुडीमध्ये 30 लोक प्रवास करू शकतील.

• यामध्ये दोन चालक, दोन डायव्हर्स, एक मार्गदर्शक आणि एक टेक्निशियन असेल. एका वेळी 24 प्रवासी प्रवास करू शकतील.

• प्रवाशांच्या सुरक्षेसाठी यामध्ये मेडिकल किट देखील असणार आहे.

• यामध्ये प्रत्येक सीट ही विंडो सीट असेल, जेणेकरून सर्व प्रवाशांना द्वारका नगरीचं दर्शन घेता येईल.

• प्रवाशांना ऑक्सिजन मास्क, फेस मास्क, स्कूबा ड्रेस मिळेल. यासाठी अतिरिक्त भाडं आकारलं जाणार नाही.

• यामध्ये नॅचुरल लाईट येण्याची सोय केली आहे.

• यामध्ये व्हिडिओ कॉन्फरन्सिंगची सोयही उपलब्ध असणार आहे.

• यासोबतच पाणबुडीतल स्क्रीनवर तुम्ही समुद्राचा तळ, तेथील मासे एचडीमध्ये पाहू शकाल.

इतर योजनांवर काम सुरू

केंद्र सरकार देशातील धार्मिक आणि सांस्कृतिक पर्यटनाला चालना देण्यासाठी विविध योजनांवर काम करत आहे. काशी-विश्वनाथ कॉरिडोअर, महाकाल लोक, अयोध्या, केदारनाथ, सोमनाथ आणि द्वारका कॉरिडोअर अशा योजनांवर वेगाने काम सुरू आहे.