ई-सिगारेटची विक्री करणाऱ्या १५ वेबसाईट्सना केंद्रीय आरोग्य मंत्रालयाने नोटीस बजावली आहे. ई-सिगारेट भारतात बॅन असल्यामुळे, त्याची विक्री करणे बेकायदेशीर आहे. यासंदर्भात आणखी सहा वेबसाईट्स रडारवर असून, मंत्रालय सोशल मीडियावर देखील नजर ठेऊन असणार आहे.

पीटीआयने याबाबतचं वृत्त प्रसिद्ध केलं आहे. या १५ वेबसाईट्सपैकी चार वेबसाईट्सनी ई-सिगारेटची विक्री बंद केली असून, इतरांनी अद्याप नोटीसला उत्तर दिलं नसल्याचं एका अधिकाऱ्याने पीटीआयला सांगितलं.

"तुमच्या वेबसाईटवर ई-सिगारेट बाबत जाहिरात आणि विक्री सुरू असल्याची माहिती समोर आली आहे. ई-सिगारेट प्रतिबंध कायद्या अंतर्गत हे बेकायदशीर आहे. त्यामुळे कोणत्याही प्रकारे पुराव्याला धक्का न पोहचवता अशा प्रकारची माहिती वेबसाईटवरुन काढून टाकावी" असे या वेबसाईटना दिलेल्या पत्रात म्हटलं आहे.

"जर त्यांनी वेळेत उत्तर दिलं नाही, आणि कायद्याचे पालन केले नाही, तर आरोग्य मंत्रालय याबाबत इलेक्ट्रॉनिक्स आणि टेलिकम्युनिकेशन मंत्रालयाला या वेबसाईट बंद करण्याचे निर्देश देईल. तसेच, या वेबसाईटवर कायदेशीर कारवाई देखील करण्यात येईल", असं या अधिकाऱ्याने स्पष्ट केलं.

नोटीस मिळाल्यापासून ३६ तासांमध्ये उत्तर देण्याचे निर्देश या वेबसाईट्सना देण्यात आले आहेत. यातील चार कंपन्यांनी उत्तर दिलं असून, बाकीच्यांच्या उत्तराची प्रतीक्षा आम्ही करत आहोत, असं या अधिकाऱ्याने सांगितलं. यासोबतच, सोशल मीडियावर पोस्ट होत असलेल्या ई-सिगारेटच्या जाहिरातींवरही मंत्रालयाचं लक्ष असल्याचं या अधिकाऱ्याने स्पष्ट केलं.